छत्रपती संभाजीनगर: टी सिरीजचे मालक गुलशन कुमार (Gulshan Kumar Murder) यांच्या हत्येप्रकरणातील मुख्य शूटर अब्दुल मर्चंट याचा छत्रपती संभाजीनगरमधील हर्सूल कारागृहात मृत्यू झाला आहे. गुरुवारी सकाळी त्याला हृदयविकाराचा झटका आल्याने घाटी रुग्णालयात नेण्यात आले, मात्र तिथे डॉक्टरांनी त्याला मृत घोषित केले. अब्दुल मर्चंट हा या हायप्रोफाईल हत्या प्रकरणात जन्मठेपेची शिक्षा भोगत होता.
ऑगस्ट 1997 मध्ये मुंबईतील अंधेरी येथील एका मंदिरातून बाहेर पडत असताना अब्दुल मर्चंटने गुलशन कुमार यांच्यावर 16 गोळ्या झाडल्या होत्या. खंडणीसाठी अबू सालेमच्या सांगण्यावरून हे हत्याकांड घडवण्यात आले होते. गुलशन कुमार यांच्याकडे 10 कोटींची मागणी करण्यात आली होती, मात्र त्यांनी ती फेटाळून लावत वैष्णो देवी मंदिरात भंडारा घालण्याचे उत्तर दिले होते. या हत्येनंतर शूटरने अबू सालेमला फोन लावून गुलशन कुमार यांचा कळवळण्याचा आवाज ऐकवला होता, अशी माहिती समोर आली होती.
कॅसेट किंग म्हणून ओळखले जाणारे गुलशन कुमार यांनी मेहनतीने स्वतःचे साम्राज्य उभे केले होते, परंतु अंडरवर्ल्डच्या दहशतीमुळे त्यांचा दुर्दैवी अंत झाला. या हत्येतील प्रमुख आरोपीचा आता तुरुंगातच अंत झाल्याने पुन्हा एकदा हे प्रकरण चर्चेत आले आहे. हर्सूल कारागृह प्रशासनाकडून या मृत्यूबाबत पुढील कायदेशीर प्रक्रिया पूर्ण केली जात आहे.
