पुणे : पुण्यात प्रदर्शित होत असलेल्या अभिनेता शाहरुख खानच्या पठाण चित्रपटावरून बजरंग दल आक्रमक झाले आहे. शाहरुख खानच्या काही चाहत्यांनी चित्रपटगृहाबाहेर हे पोस्टर लावले होते. पुण्यातील राहुल चित्रपटगृहाच्या बाहेरील पोस्टर बजरंग दलाकडून काढण्यात आले आहे. तसेच बजरंग दलाने राहुल थिएटरच्या चालकांना इशारा देऊन पोस्टर काढण्याची विनंती केली. त्यानंतर हे पोस्टर हटवण्यात आले.
पठाण हा चित्रपट २५ जानेवारी २०२३ रोजी प्रेक्षकांच्या भेटीस येणार आहे. शाहरुख खानच्या पठाण चित्रपटाला हिंदुत्ववादी संघटना या विरोध करत आहेत. गेल्या काही दिवसांपासून पठाण चित्रपट बॉयकॉट करण्याची मागणी देखील सोशल मीडियावर केली जात आहे.
दरम्यान, पठाण या चित्रपटातील बेशरम रंग आणि झुमे जो पठाण ही गाणी प्रेक्षकांच्या भेटीस आली. यामधील बेशरम रंग या गाण्यात अभिनेत्री दीपिका पादुकोणने परिधान केलेल्या बिकीनीच्या रंगावर अनेकांनी आक्षेप घेतला. त्यानंतर हा चित्रपट वादाच्या भोवऱ्यात अडकला.
