पुणे: ‘देऊळ बंद 2’ या गाजलेल्या मराठी चित्रपटाने बॉक्स ऑफिसवर 100 कोटींपेक्षा अधिक कमाई करत मोठे यश मिळवले. या यशाचा आनंद साजरा करण्यासाठी चित्रपटाचे निर्माते कैलास वाणी यांनी संपूर्ण कलाकार आणि तांत्रिक टीमसाठी विशेष गौरव सोहळ्याचे आयोजन केले. या कार्यक्रमात अनेक कलाकार आणि सहकाऱ्यांचा सन्मान करण्यात आला.
या सोहळ्यात अभिनेता तसेच चित्रपटाचे कार्यकारी निर्माते रमेश परदेशी (पिट्या भाई), अतुल कुडले आणि विनोद वनवे यांना विशेष पुरस्कार देण्यात आले. दिग्दर्शक प्रवीण तरडे यांच्या हस्ते प्रत्येकाला ₹1 लाखांचा धनादेश आणि सन्मानचिन्ह देऊन गौरव करण्यात आला.
पुरस्कार जाहीर करताना प्रवीण तरडे यांनी अतुल कुडले यांच्या कामाचे विशेष कौतुक केले. त्यांनी सांगितले की, चित्रपटाच्या पहिल्या दिवसापासून शेवटपर्यंत अतुलने शिस्त, मेहनत आणि समर्पण कायम ठेवले. संपूर्ण शूटिंगदरम्यान त्यांनी एकदाही संवादात चूक केली नाही. रोज सेटवर वेळेवर येत होता. चित्रपट प्रदर्शित झाल्यानंतरही सलग 50 दिवस महाराष्ट्रातील विविध चित्रपटगृहांमध्ये जाऊन त्यांनी चित्रपटाच्या प्रचारासाठी मेहनत घेतली. “कलाकार कसा असावा, तर अतुल कुडलेसारखा,” असे गौरवोद्गारही त्यांनी काढले. त्यांच्या या वक्तव्यानंतर सभागृहात जोरदार टाळ्यांचा कडकडाट झाला.
रमेश परदेशी यांच्याबद्दल बोलताना प्रवीण तरडे यांनी चित्रपट निर्मितीदरम्यान आलेल्या अनेक अडचणी त्यांनी शांतपणे सोडवल्याचे सांगितले. “अनेक कठीण प्रसंगात मी फक्त पिट्या भाईंचेच ऐकत होतो,” असेही त्यांनी नमूद केले.
‘देऊळ बंद 2’मध्ये अतुल कुडले यांनी ‘दत्ता पायगुडे’ या शेतकरी तरुणाची भूमिका साकारली आहे. चित्रपटाच्या सुरुवातीपासून शेवटपर्यंत त्यांच्या भूमिकेचा प्रभाव दिसून येतो. त्यांच्या अभिनयाला प्रेक्षकांकडून चांगला प्रतिसाद मिळाला असून, विशेषतः ग्रामीण भागातील तरुणांमध्ये ही भूमिका लोकप्रिय ठरत आहे.
सन्मान स्वीकारल्यानंतर अतुल कुडले यांनी आपल्या भावना व्यक्त करताना सांगितले की, प्रायोगिक रंगभूमीपासून सुरू झालेला अभिनयाचा प्रवास आज या टप्प्यावर पोहोचला, ही मोठी आनंदाची बाब आहे. झी मराठीवरील मालिकांमधून ओळख मिळाल्यानंतर प्रवीण तरडे यांच्या दिग्दर्शनाखाली काम करण्याची संधी मिळाली आणि आता अशा मोठ्या चित्रपटाचा भाग बनल्याचा अभिमान वाटत असल्याचे त्यांनी सांगितले.
कॉर्पोरेट क्षेत्रात काम करत असतानाच अभिनयाची आवड जपत अतुल कुडले यांनी रंगभूमीवरून प्रवास सुरू केला. त्यानंतर झी मराठीवरील ‘लाखात एक आमचा दादा’ या मालिकेतील शत्रुघ्न निंबाळकर ही भूमिका लोकप्रिय ठरली. आता ‘देऊळ बंद 2’मधील दमदार अभिनयामुळे ते मराठी चित्रपटसृष्टीतील आश्वासक नवोदित कलाकार म्हणून चर्चेत आले आहेत.
प्रवीण तरडे यांच्या हस्ते मिळालेला ‘बेस्ट आर्टिस्ट’ पुरस्कार आणि सार्वजनिक कौतुक हा अतुल कुडले यांच्या अभिनय कारकिर्दीतील महत्त्वाचा टप्पा मानला जात आहे.
