पुणे : पुणे महानगरपालिका शाळांमध्ये लवकरच सीबीएसई अभ्यासक्रम सुरू होणार आहे. अशी मोठी घोषणा राज्याचे उच्च आणि तंत्र शिक्षण मंत्री तथा पालकमंत्री चंद्रकांत पाटील यांनी केली आहे. आणि याचा विचार महापालिका प्रशासनाने करावा अशा सूचनाही त्यांनी दिल्या आहेत.
पुणे महानगरपालिकेच्या वतीने २०२२-२३ या शैक्षणिक वर्षातील आदर्श शिक्षकांना पुरस्कार वितरण चंद्रकांत पाटील यांच्या हस्ते करण्यात आले. त्यावेळी बोलताना त्यांनी वरील घोषणा केली आहे. आणि अल्प उत्पन्न गटातील मुलांसाठी महानगरपालिका शाळेत सीबीएसई अभ्यासक्रम सुरू करता येईल का, याचाही विचार करावा, अशी सूचना केली. यावेळी महापालिका आयुक्त विक्रम कुमार, शिक्षणाधिकारी मीनाक्षी राऊत, पोपटराव काळे, शिक्षण समितीच्या माजी अध्यक्षा मंजुश्री खेडेकर आदी मान्यवर उपस्थित होते.
पुढे बोलताना चंद्रकांत पाटील म्हणाले कि, देशाच्या प्रगतीची मजबूत पायाभरणी करण्यासाठी शाळेतून जीवन जगण्याचा आनंद देणारे शिक्षण मिळणे गरजेचे आहे. शाळांच्या गरजा पूर्ण करण्यासाठी शासन, महानगरपालिका, उद्योग आणि दानशूर व्यक्तींचे सहकार्य केले पाहिजे. विद्यार्थी केवळ उत्तीर्ण होऊन चालणार नाही तर त्याचा पाया मजबूत व्हायला हवा.
दरम्यान, विद्यार्थ्यांना अभ्यासासोबत महापुरुषांची चरित्रे आणि आपल्या संस्कृतीविषयीची माहिती देखील द्यावी. वाढत्या लोकसंख्येच्या शहरात राज्य आणि देशातील विविध भागातून रोजगारासाठी नागरिक येतात. त्यापैकी कमी उत्पन्न असलेल्यांची संख्याही बऱ्यापैकी आहे. या नागरिकांच्या मुलांच्या शिक्षणासाठी महानगरपालिकेच्या शाळा प्रमुख आधार आहे. अशा शाळेतून सीबीएसई अभ्यासक्रम सुरू करता येईल का? याचा विचार करण्याची गरज आहे. असेही यावेळी बोलताना पाटील यांनी सांगितले आहे.
यावेळी बोलताना महापालिका आयुक्त विक्रम कुमार म्हणाले, करोनामुळे दोन वर्षे आदर्श शिक्षक पुरस्कार वितरण झाले नाही. या संकट काळात शिक्षकांनी ऑनलाइन माध्यमातून अध्यापनाचे कार्य केले. महानगरपालिकेच्या एकूण ३०० शाळा असून १ लाख १० हजार विद्यार्थी शिक्षण घेतात. या विद्यार्थ्यांना दर्जेदार शिक्षण देण्याची महानगरपालिकेची जबाबदारी आहे. सर्व शाळा डिजिटल केल्या असून अत्याधुनिक शैक्षणिक सुविधा उपलब्ध करून देण्यात आल्या आहेत. यापुढे अधिक उत्तम शिक्षण सुविधा उपलब्ध करून देण्याचा प्रयत्न करणार आहे.
