नवी दिल्ली : भारतीय अर्थव्यवस्थेत अनेक बाबींचे विशेष असे योगदान आहे. त्यात परकीय चलन हेदेखील आहे. देशाच्या याच परकीय चलनाच्या साठ्यात मोठी वाढ झाली आहे. परकीय चलनाचा साठा साडेचार अब्ज डॉलर्सपेक्षा जास्त वाढला आहे. सध्या हा चलन साठा 590.78 अब्ज डॉलरवर पोहोचला आहे.
आरबीआयने परकीय चलन साठ्याची आकडेवारी नुकतीच जाहीर केली. यामध्ये परकीय चलनाचा साठा 4.67 अब्ज डॉलरने वाढून 590.78 अब्ज डॉलरवर पोहोचला आहे. तर पहिल्या आठवड्यात परकीय चलनाचा साठा 586.11 अब्ज डॉलर होता. परकीय चलन संपत्तीतही मोठी वाढ दिसून आली आहे. परकीय चलन संपत्ती 4.392 अब्ज डॉलरने वाढून 521.896 अब्ज डॉलर झाली आहे.
कच्च्या तेलाच्या किमतीत मोठी घसरण झाल्याने परकीय चलनाच्या साठ्यावरही सकारात्मक परिणाम होईल. कच्चे तेल प्रति बॅरल 80 डॉलरच्या खाली घसरले आहे. कच्च्या तेलाच्या खरेदीसाठी सरकारी तेल कंपन्यांना पूर्वीपेक्षा कमी डॉलर खर्च करावे लागतील.
सोन्याच्या साठ्यातही वाढ
आरबीआयचा सोन्याचा साठा 200 दशलक्ष डॉलरच्या वाढीसह 46.123 अब्ज डॉलर होता. एसडीआरमध्ये 64 दशलक्ष डॉलर्सची वाढ होऊन ते 17.975 अब्ज डॉलर्सवर पोहोचले आहे. आंतरराष्ट्रीय नाणेनिधीमध्ये जमा असलेला साठा 16 दशलक्ष डॉलर्सने वाढून 4.789 अब्ज डॉलरवर पोहोचला आहे. याशिवाय, शेअर बाजारातही तेजी पाहिला मिळत आहे.
