Yawat : यवत पोलीस ठाण्याच्या हद्दीत चोरट्यांनी धुमाकूळ घातला असून दिवसेंदिवस घरफोडीच्या घटना वाढताना दिसत आहे. यामुळे नागरिक चांगलेच धास्तावले आहे. दौंड तालुक्यातील वरवंड येथील वकिलवस्ती परिसरात पहाटेच्या सुमारास धाडसी घरफोडीची घटना घडली असून अज्ञात चोरट्यांनी घरात घुसून घड्याळे, रोख रक्कम तसेच दोन मोटारसायकली आणि डंपरसह तब्बल 12 लाख 50 हजार रुपयांचा ऐवज लंपास केल्याने परिसरात खळबळ उडाली आहे. ही घटना गुरुवारी (ता. 12) पहाटे साडेचार वाजता घडली.
या प्रकारामुळे वरवंड व परिसरात खळबळ उडाली असून नागरिकांमध्ये भीतीचे वातावरण निर्माण झाले आहे. याप्रकरणी यवत पोलीस ठाण्यात घरफोडीचा गुन्हा दाखल करण्यात आला आहे. याप्रकरणी अमोल रमेश दिवेकर (वय-36, व्यवसाय शेती, रा. वरवंड वकिलवस्ती, ता. दौंड, जि. पुणे) यांनी फिर्याद दिली आहे.
मिळालेल्या माहितीनुसार, फिर्यादी अमोल दिवेकरहे वकीलवस्ती येथे राहतात. गुरुवारी पहाटे साडेचार वाजेच्या सुमारास अज्ञात चोरट्यांनी त्यांच्या घराच्या हॉलच्या खिडकीचे लोखंडी गज कशाच्या तरी सहाय्याने तोडले. त्या खिडकीवाटे चोरट्यांनी आत प्रवेश केला आणि बेडरूममधील लोखंडी कपाटावर डल्ला मारला. यावेळी कपटाटील टायटन कंपनीची 4 मनगटी घड्याळे, रोख रक्कम 20 हजार रुपये ऐवज पळवला.
चोरट्यांनी गावातील इतर ठिकाणांवरही हात साफ केला. चंद्रकांत प्रभाकर काकडे यांच्या घरासमोरील हिरो होंडा सीडी डॉन (MH 16 W 8552) आणि कल्याण संजय कारंडे यांची हिरो होंडा सीडी डॉन (MH 42 6412) या दोन मोटारसायकली चोरून नेण्यात आल्या. तसेच MH 42 T 0920 क्रमांकाचा अंदाजे 12 लाख रुपयांचा सहा टायरचा डंपर आणि त्यामधील चार हजार रुपये किमतीचा मुरुम देखील चोरट्यांनी पळवून नेल्याचे समोर आले आहे.
दरम्यान, या घटनेत एकूण 12 लाख 50 हजार रुपयांचा मुद्देमाल चोरीला गेला असून परिसरात भीतीचे वातावरण निर्माण झाले आहे. या प्रकरणी बीएनएस कलम 305, 303 (2), 331(4) अन्वये गुन्हा दाखल करण्यात आला आहे. एकाच रात्री घरफोडी आणि तीन वाहने चोरीला गेल्यामुळे यवत पोलिसांसमोर मोठे आव्हान उभे राहिले आहे. यवत पोलीस शोध घेत आहेत.
