बारामती : कर्जबाजारीला कंटाळून एका ३५ वर्षाच्या तरुणाने राहत्या घरात वायरच्या सहाय्याने गळफास घेऊन आत्महत्या केल्याची धक्कादायक घटना माळेगाव (ता. बारामती) गावातील पिरदर्गा जवळ घडली आहे. हि घटना शुक्रवारी (ता. २३) घडली आहे.
महंमद हसन शेख (वय ३५, रा. पिरदर्गा, माळेगाव ता. बारामती) असे आत्महत्या केलेल्या तरुणाचे नाव आहे. याबाबत शाहरुख गुलाब फकीर इनामदार यांनी माळेगाव पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, महंमद शेख हा पेंटरचे काम करत होता. त्याला पाच लहान मुली आणि पत्नी असा परिवार आहे. शुक्रवारी घरी कोणी नसताना त्याने राहत्या घरी आत्महत्या केली. यावेळी पोलीस उपनिरीक्षक देविदास साळवे, पोलीस नाईक ज्ञानेश्वर सानप यांनी ग्रामस्थांच्या मदतीने घराचा दरवाजा तोडून महंमद शेख यांचा लटकलेला मृतदेह खाली घेतला.
दरम्यान, मयत महम्मद हसन शेख याचा मृतदेह खाली घेतला असता त्यांच्या खिशात ३ चिठ्ठ्या सापडल्या आहेत. या चिठ्ठीत हिंदीत मजकूर लिहिला असून “मेरे पास बहुत जनोका पैसा है वो फोन करते है तो मुझे डर लगता है.. मुझे माफ करो बुबु मुझे खुदाने बुलाया है..” अशा आशयाचा मजकूर होता. यामुळे पैसे मागणारे व फोन करणारे ते कोण होते? याची कुजबुज सुरु होती.
