Shirur News : शिरुर : अष्टविनायकापैकी एक असलेल्या श्री क्षेत्र रांजणगाव गणपती येथील महागणपती मंदिरात पुण्यातील कुख्यात गुंड गजा मारणे याचा सत्कार करण्यात आला. हा सत्कार होत असताना रांजणगाव देवस्थान ट्रस्टच्या विश्वस्तांची उपस्थिती नव्हती. त्यांच्या अनुपस्थितीत हा सर्व प्रकार घडला.
शिरुर तालुक्यामध्ये काही गावातील ग्रामपंचायत निवडणुकीची रणधुमाळी सुरु असून, उमेदवारी अर्ज भरण्याची प्रक्रिया सुरु आहे. त्यातच सोमवारी (ता. १६) सकाळी दहा वाजण्याच्या सुमारास गुंड मारणेचा सत्कार करण्यात आला. याबाबतची माहिती रांजणगाव एमआयडीसी पोलिसांना कळताच त्यांनी या सर्व राजकीय नेत्यांना पोलिस ठाण्यात चौकशीला बोलावून चांगलेच फैलावर घेतले.
गुंड प्रवृत्तीच्या लोकांना गावात आणून दहशत निर्माण केला तर…
याबाबत रांजणगाव एमआयडीसी पोलिस ठाण्याचे पोलिस निरीक्षक महेश ढवाण यांनी म्हटले की, ‘ग्रामपंचायत निवडणुकीच्या अनुषंगाने गुंड प्रवृत्तीच्या लोकांना गावात आणून दहशत निर्माण करण्याचा जर कोणी प्रयत्न केला. तर त्यांच्यावर प्रतिबंधात्मक कारवाई प्रस्तावित करण्यात येईल’.
