Shirur News शिरूर, ता. 30 : बैलगाडा शर्यतीच्या थरारात एक दुर्दैवी घटना घडली असून बैलाच्या जोरदार धडकेत ३५ वर्षीय तरुणाचा मृत्यू झाल्याने परिसरात हळहळ व्यक्त होत आहे. ही घटना करंदी (ता. शिरूर) येथे आयोजित बैलगाडा शर्यतीदरम्यान घडली. Shirur News
मृत तरुणाचे नाव प्रकाश महादू फटांगडे (रा. कान्हूर मेसाई, ता. शिरूर, जि. पुणे) असे आहे. मिळालेल्या माहितीनुसार, करंदी येथे ‘करंदी केसरी २०२६’ या बैलगाडा शर्यतीचे आयोजन करण्यात आले होते. शर्यत सुरू असताना एका बैलगाड्याचे बैल नियंत्रणाबाहेर गेले. त्यावेळी बैलांना आवरण्याचा प्रयत्न करताना प्रकाश फटांगडे पुढे गेले. मात्र, अचानक बैलाने जोरदार धडक दिल्याने ते खाली कोसळले. Shirur News
घटनेनंतर उपस्थित नागरिकांनी तातडीने त्यांना उपचारासाठी रुग्णालयात दाखल केले. मात्र, डॉक्टरांनी तपासणी करून त्यांचा मृत्यू झाल्याचे घोषित केले. या घटनेने शर्यतीतील उत्साहावर विरजण पडले असून परिसरात शोककळा पसरली आहे. याप्रकरणी गोरक्ष महादू फटांगडे (रा. कान्हूर मेसाई) यांनी शिक्रापूर पोलीस ठाण्यात खबर दिली आहे. पोलिसांनी आकस्मित मृत्यूची नोंद केली असून पुढील तपास पोलीस हवालदार नरेंद्र गायकवाड करीत आहेत. Shirur News
