Pune News : पुणे : शहरातील एका नामांकित महाविद्यालयाच्या प्राचार्यांना पोक्सो गुन्ह्यात अडकवण्याची धमकी देत तब्बल सात लाख रुपयांची खंडणी उकळल्याप्रकरणी पुणे पोलिसांच्या गुन्हे शाखेने मोठी कारवाई केली आहे. या प्रकरणात बडतर्फ पोलिस उपनिरीक्षक अजित त्र्यंबक बडे आणि पोलिस अंमलदार सुदाम बाळकृष्ण तायडे यांना शुक्रवारी अटक करण्यात आली. Pune News :
न्यायालयाने दोघांना १९ मेपर्यंत पोलिस कोठडी सुनावली आहे. दरम्यान, या प्रकरणातील बडतर्फ महिला पोलिस अंमलदार आणि सोशल मीडियावर ‘रील स्टार’ म्हणून ओळख असलेली सोनाली हिंगे अद्याप फरार असून पोलिस तिचा शोध घेत आहेत. Pune News :
तपासादरम्यान समोर आलेल्या माहितीनुसार, शिवाजीनगर पोलिस ठाण्यातील दामिनी पथकात कार्यरत असताना सोनाली हिंगे हिची एका अल्पवयीन मुलीशी ओळख झाली होती. आरोपींनी या मुलीला नामांकित महाविद्यालयात प्रवेश मिळवून देण्याचे आमिष दाखवत आपल्या जाळ्यात ओढल्याचा आरोप आहे. त्यानंतर संबंधित मुलीमार्फत प्राचार्यांविरोधात खोटी तक्रार दाखल करण्यासाठी दबाव टाकण्यात आला. Pune News :
तसेच, प्राचार्यांवर पोक्सो अंतर्गत गंभीर गुन्हा दाखल करून अटक करण्याची धमकी देण्यात आली. वैयक्तिक आयुष्य आणि शैक्षणिक संस्थेची प्रतिमा मलिन करण्याचा कट रचून आरोपींनी प्राचार्यांकडून सात लाख रुपयांची खंडणी उकळल्याचा आरोप पोलिसांनी केला आहे. Pune News :
दरम्यान, या प्रकरणामुळे पुण्यातील शैक्षणिक वर्तुळात मोठी खळबळ उडाली असून, पोलिस दलातील काही बडतर्फ कर्मचाऱ्यांच्या गैरकृत्यांवरही प्रश्नचिन्ह उपस्थित झाले आहे. गुन्हे शाखेकडून या रॅकेटमध्ये आणखी कोणाचा सहभाग आहे का, याचाही तपास सुरू आहे. Pune News :
