पुणे : भटकी मांजर शेजारी राहणारांच्या घरात गेल्याच्या कारणावरून दोन महिलांमध्ये तुफान हाणामारी झाल्याची घटना खडकी परिसरात घडली आहे. याप्रकरणी दोन्ही शेजाऱ्यांनी एकमेकांवर आरोप केलेत. त्यांच्या तक्रारींवरून अदखलपात्र गुन्हा नोंदवण्यात आला आहे.
उषा मधुकर वाघमारे (वय ४५ रा. सावंत नगर खडकी पुणे) आणि रेश्मा सलिम शेख (वय ४५ ) यांनी तक्रारी केल्या आहेत.
पोलिसांनी दिलेल्या माहितीनुसार, उषा आणि रेश्मा या महिला पुण्यातल्या खडकी परिसरात शेजारी राहतात. रेश्मा यांच्याकडे एक भटकी मांजर आहे. जिला त्या सांभाळतात. शनिवारी (ता. ०४) दुपारच्या वेळेत उषा वाघमारे या घरात कपडे धुवत असताना मांजर त्यांच्या घरात गेली. हे पाहून रेश्माने उषाच्या घरात जाऊन तिला परत आणलं. मात्र, परत आणत असताना रेश्माने मांजराला दरडावलं. कोणाच्या घरात जायचं हे कळत नाही? असं बोललं.
दरम्यान, रेश्मा या मांजरीवरून घालून पाडून बोलल्याने उषाही संतापल्या. यामुळे दोघींमध्ये वादाला सुरुवात झाली. या वादात नंतर एकमेकांना शिव्या देऊ लागल्या. हा वाद टोकाला जात उषा आणि रेश्मा यांच्यात हाणामारी झाली. आणि हा वाद थेट खडकी पोलीस ठाण्यात पोहचला. पोलिसांनी दोघांची बाजू ऐकून घेतली.
या प्रकरणी दोघांनी एकमेकांविरोधात तक्रार केल्यानंतर पोलिसांनी अदाखलपात्र गुन्हा नोंदवला आहे.
