(Pune News) विल्हे, (पुणे) : पानशेत धरणाच्या बॅक वॉटरमध्ये एका परप्रांतीय सॉफ्टवेअर इंजिनिअरचा पाण्यात पाय घसरून मृत्यू झाल्याची घटना नुकतीच उघडकीस आली आहे. तब्बल १४ तासांच्या शोध मोहिमेनंतर त्याचा मृतदेह सापडला, अशी माहिती पानशेत पोलिसांकडून देण्यात आली आहे.
मोहित हेमंत सराफ (वय ३०, रा. मध्यप्रदेश) असे मृत व्यक्तीचे नाव आहे. याबाबत निखिल किशोर बडगुजर या अभियंत्याने वेल्हे पोलीस स्टेशनमध्ये फिर्याद दिली आहे.
पोलिसांनी दिलेल्या माहितीनुसार…!
मोहित सराफ कामानिमित्ताने बाणेर येथील एका खाजगी कंपनीत मिटिंगसाठी आला होता. ३ एप्रिल ते ७ एप्रिल रोजी दुपारी दोन पर्यंत अवलारा टेक्नॉलॉजी प्रायव्हेट लिमिटेड कंपनीची मिटिंग बाणेर येथे आयोजित करण्यात आली होती. या मीटिंगसाठी कंपनीचे देशातील कामगार उपस्थित होते.
शुक्रवारी दुपारी सात एप्रिल रोजी दुपारी तीनच्या सुमारास मिटिंग संपल्यानंतर कंपनीतील मुले व मूली यांचा ग्रुप पानशेत परिसरातील धिंडली (ता. वेल्हे) येथील आर्यावत रिसॉर्टवर कॅम्पिंगसाठी आला होता. सायंकाळी ५.३० वाजता सर्व जण रिसोर्टवर पोहचले.
रिसोर्ट फिरल्यानंतर अनशूल कमल अमेठा, वृषाली रामभाऊ गायधने, हरविंदरजित भसिंग सिंग, शबनम नरुद्दीन सिध्दीकी, मानसी संजयकुमार अगरवाल, मोहित हेमंत सराफ हे सर्वजण पानशेत धरणाचे बॅकवॉटर पाहण्यासाठी पायी चालत गेले. धरणाच्या बॅकवॉटरच्या गुडघाभर पाण्यात सर्वजण गेले. यावेळी मोहीम सराफ याचा पाय घसरुन खोल पाण्यात त्याचा तोल गेला.
त्यावेळी निखिल किशोर बडगुजर हा देखील यावेळी पाण्यात पडला. परंतु जमिनीजवळ असलेल्या दगडाला धरुन तो वर आला. यानंतर मोहितला काढण्यासाठी सर्वजणांनी साखळी तयार केली. सर्वांनी मोहितला पाण्यातून वर काढण्याचा प्रयत्न करत असताना अनशुल अमेठा हा सर्वात पुढे होता. त्याचा देखील पाय घसरु लागल्याने सर्वजण घाबरुन पाण्याच्या बाहेर आले.
दरम्यान, सर्वांच्या डोळ्यादेखत मोहित पाण्यात बुडाला. कोणालाही पोहता येत नसल्याने त्याला कुणीही वाचवू शकले नाही.
पानशेत पोलीस चौकीचे पोलिस उपनिरीक्षक महेश कदम, पोलीस हवालदार पंकज मोघे, राजाराम होले अधिक तपास करीत आहेत.
