Pune : खडकवासला धरणाच्या बॅकवॉटर परिसरात पाण्यावर तरंगत असलेला एका तरुणाचा मृतदेह आढळून आल्याची घटना आज उघडकीस आली. हवेली आपत्ती व्यवस्थापन रेस्क्यू टीमच्या मदतीने मृतदेह पाण्यातून बाहेर काढण्यात आला.
मिळालेल्या माहितीनुसार, दीपक सपकाळ (वय २९, रा. सोनापूर, ता. हवेली, जि. पुणे) हा सध्या कोल्हेवाडी येथे वास्तव्यास होता. तो काल संध्याकाळपासून घरातून बेपत्ता होता. याबाबत नांदेड सिटी पोलीस स्टेशन येथे हरवल्याची तक्रार दाखल करण्यात आली होती.
दरम्यान, आज खडकवासला बॅकवॉटर परिसरात फिरण्यासाठी आलेल्या पर्यटकांना पाण्यावर एक अनोळखी मृतदेह तरंगताना दिसला. त्यांनी तात्काळ ११२ या आपत्कालीन क्रमांकावर संपर्क साधून माहिती दिली. त्यानंतर संबंधित यंत्रणांना कळविण्यात आले.
माहिती मिळताच हवेली आपत्ती व्यवस्थापन प्रमुख तानाजी भोसले यांच्या मार्गदर्शनाखाली रेस्क्यू टीम घटनास्थळी दाखल झाली. टीमचे सदस्य संजय चोरघे, योगेश गोपी व हरिदास कुंडलिकराव वऱ्हाड यांनी तत्परतेने पाण्यात उतरून मृतदेह बाहेर काढण्याची कारवाई केली.
मृतदेहाची ओळख पटवून पुढील पंचनामा व कायदेशीर प्रक्रिया पोलिसांकडून करण्यात आली असून मृत्यूचे नेमके कारण शवविच्छेदन अहवालानंतर स्पष्ट होणार आहे. घटनेमुळे परिसरात हळहळ व्यक्त होत असून पुढील तपास सुरू आहे.
