Lonikalbhor News : लोणी काळभोर परिसरात दादागिरीचा आणखी एक प्रकार समोर आला आहे. मुलीबरोबर झालेल्या किरकोळ वादाचा राग मनात धरून एका 46 वर्षीय महिलेला शिवीगाळ, मारहाण आणि जीवे मारण्याची धमकी दिल्याची घटना शुक्रवारी (ता. 27) दुपारी सुमारे 2 वाजता घडली. घटनेनंतर लोणी काळभोर पोलिसांनी तत्काळ कारवाई करत आरोपीला अटक केली.
अस्लम अन्वर शेख (वय 25, रा. जयहिंद नगर वस्ती, कदमवाकवस्ती, ता. हवेली, जि. पुणे) असे अटक करण्यात आलेल्या आरोपीचे नाव आहे. या प्रकरणी संबंधित महिलेने लोणी काळभोर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी महिला लोणी काळभोर परिसरात कुटुंबासह राहतात. आरोपी अस्लम शेख हा हमालीचे काम करतो. फिर्यादी आणि आरोपी हे एकमेकांच्या ओळखीचे आहेत. फिर्यादी यांच्या मुलगी आणि आरोपी यांच्यात काही दिवसांपूर्वी वाद झाला होता.
शुक्रवारी दुपारी फिर्यादी या आपल्या दोन मुलींसह घरी असताना, मुलीसोबत झालेल्या वादाचा राग काढण्यासाठी अस्लम शेख त्यांच्या घराजवळ आला. त्याने फिर्यादी महिलेला अश्लील व अपमानास्पद शिवीगाळ केली, हाताने मारहाण केली आणि “जिवंत सोडणार नाही” अशी धमकी दिली. तसेच तिच्या स्त्रीमनाला लज्जा वाटेल असे अश्लील वक्तव्य केल्याचा आरोप आहे.
या घटनेनंतर महिलेने तात्काळ पोलीस ठाण्यात धाव घेत तक्रार नोंदवली. त्यानुसार अस्लम शेख याच्याविरोधात भारतीय न्याय संहिता 2023 अंतर्गत कलम 79, 115(2), 351(2)(3) आणि 352 अन्वये गुन्हा दाखल करण्यात आला आहे.
पोलीस ठाण्याच्या नोंदीप्रमाणे आरोपी हा सराईत गुन्हेगार असून यापूर्वीही त्याच्याविरुद्ध गुन्हे दाखल आहेत. त्यामुळे परिसरात संतापाचे वातावरण निर्माण झाले असून नागरिकांनी कठोर कारवाईची मागणी केली आहे.
