Pune Accident पुणे, ता. १७ : पुण्यातील खडकवासला परिसरात शनिवारी सायंकाळी एक भीषण अपघात घडला असून, भरधाव वेगातील कारने तब्बल सहा दुचाकी आणि एका रिक्षाला जोरदार धडक दिल्याने परिसरात एकच खळबळ उडाली. या भीषण अपघातात चार वर्षीय चिमुकल्याचा दुर्दैवी मृत्यू झाला असून, तीन ते चार जण गंभीर जखमी झाल्याची माहिती समोर आली आहे. संपूर्ण घटना परिसरातील सीसीटीव्ही कॅमेऱ्यात कैद झाली आहे. Pune Accident
मिळालेल्या माहितीनुसार, एमएच २५ बीएच ६४८९ क्रमांकाची ‘टाटा पंच’ कार खडकवासला धरणाच्या दिशेने जात होती. सायंकाळी साडेपाचच्या सुमारास चालकाचे वाहनावरील नियंत्रण सुटले आणि भरधाव कारने रस्त्यावर उभ्या असलेल्या सहा दुचाकींसह एका रिक्षाला जोरदार धडक दिली. धडक इतकी भीषण होती की, अनेक वाहने अक्षरशः चुराडा झाली. त्यानंतर कार थेट रस्त्याच्या विरुद्ध बाजूच्या दुकानात घुसली. Pune Accident
या अपघातात यशराज निलेश कांबळे या चार वर्षीय चिमुकल्याला गंभीर दुखापत झाली. त्याला तातडीने सिंहगड रोडवरील खासगी रुग्णालयात दाखल करण्यात आले. मात्र उपचार सुरू असतानाच सायंकाळी साडेसहाच्या सुमारास त्याचा मृत्यू झाला. या घटनेमुळे कांबळे कुटुंबीयांवर दु:खाचा डोंगर कोसळला आहे. Pune Accident
अपघातात अन्य काही नागरिक गंभीर जखमी झाले असून त्यांच्यावर उपचार सुरू आहेत. अपघातानंतर परिसरात मोठी गर्दी झाली होती. संतप्त नागरिकांनी चालकाविरोधात तीव्र संताप व्यक्त केला. Pune Accident
दरम्यान, पोलिसांनी कार चालक अमोल गोरक्षनाथ गेगडे याला ताब्यात घेतले असून, त्याचा मित्र प्रकाश तात्याराम कोठारे यालाही चौकशीसाठी पकडण्यात आले आहे. दोघांची वैद्यकीय तपासणी करण्यासाठी त्यांना ससून रुग्णालयात पाठवण्यात आले आहे. घटनेची माहिती मिळताच नांदेड पोलीस ठाण्याचे अधिकारी घटनास्थळी दाखल झाले. पोलिसांनी पंचनामा करून पुढील तपास सुरू केला असून, निष्काळजीपणे वाहन चालवल्याप्रकरणी चालकाविरोधात गुन्हा दाखल करण्याची प्रक्रिया सुरू आहे. Pune Accident
