पुणे : महाराष्ट्रातून मान्सूनचा परतीचा प्रवास सुरू झाला असून, 10 ऑक्टोबरपर्यंत तो संपूर्ण राज्यातून माघारी फिरण्याची शक्यता आहे. यानंतर मुसळधार पावसाची शक्यता मावळली असून, हवामान प्रामुख्याने कोरडे राहणार आहे.मान्सूनच्या या निर्गमनामुळे राज्यात ‘ऑक्टोबर हिट’चा प्रभाव वाढणार असून नागरिकांना तीव्र उकाड्याचा सामना करावा लागणार आहे.
पाकिस्तानच्या दिशेने येणाऱ्या वेस्टर्न डिस्टर्बन्समुळे आणि हवेतील बदलांमुळे राज्यातील बहुतांश भाग कोरडा राहील. अरबी समुद्राकडून येणाऱ्या उष्ण व दमट वाऱ्यांमुळे वातावरणात उष्णता आणि उकाडा अधिक जाणवेल. त्यामुळे दुपारच्या वेळी, विशेषतः सकाळी 11 ते दुपारी 4 या कालावधीत तापमान नेहमीपेक्षा जास्त राहून कडक ऊन पडेल.
विदर्भ आणि मराठवाड्यात मे महिन्यासारखी तीव्र उष्णता जाणवण्याची शक्यता हवामान विभागाने वर्तवली आहे. मध्य महाराष्ट्रातही सरासरीपेक्षा जास्त उकाडा राहील. दुसरीकडे महाबळेश्वर, रत्नागिरी, सिंधुदुर्ग आणि पश्चिम महाराष्ट्रातील घाटमाथ्यावर काही ठिकाणी हलका पाऊस पडू शकतो; परंतु यामुळे उष्णतेपासून दिलासा न मिळता उलट उमस आणि उकाडा वाढण्याची शक्यता आहे.
बंगालच्या उपसागरात निर्माण झालेल्या चक्राकार वाऱ्यांच्या स्थितीमुळे आणि जागतिक पातळीवरील अल निनोच्या वाढत्या प्रभावामुळे वातावरणात हे मोठे बदल दिसून येत आहेत. त्यामुळे आता पावसाची छत्री बाजूला ठेवून उन्हापासून बचाव करण्यासाठी नागरिकांना काळजी घ्यावी लागणार आहे.
