पुणे : दिल्लीहून विमानाने पुण्यात येऊन मोटारींच्या काचा फोडून लॅपटाॅप, तसेच मौल्यवान ऐवजाची चोरी करणाऱ्या हरियाणातील दोघांना गुन्हे शाखेच्या युनिट चारच्या पोलिसांनी ताब्यात घेतले आहे.
विकी धरमपाल ठाकूर (वय-३४, सध्या रा. बालेवाडी, मूळ रा. सच्चाखेडा, हरियाणा), सुशीलकुमार उर्फ बिंदू (रा. दिल्ली) अशी अटक करण्यात आलेल्या दोन आरोपींची नावे आहेत. त्यांच्याकडून पोलिसांनी तब्बल ८ लाख ३५ हजार रुपयांचे १६ लॅपटाॅप जप्त करण्यात आले. आरोपींच्या पकडीमुळे तब्बल ४१ गुन्हे उघडकीस आले असल्याने पोलीसांना मोठे यश मिळाले आहे.
पोलिसांनी दिलेल्या माहितीनुसार, गेल्या काही महिन्यांपासून शहरात मोटारींच्या काचा फोडून लॅपटाॅप लांबविण्याच्या घटनांमध्ये वाढ झाली होती. गुन्हे शाखेच्या पथकाकडून चोरट्यांचा सातत्याने माग काढण्यात येत होता.
गणेशखिंड रस्त्यावर चोरटे थांबल्याची माहिती गुन्हे शाखेच्या युनिट चारच्या पथकाला मिळाली. एक जण कमी किंमतीत लॅपटाॅप विक्री करत असल्याची माहिती मिळाल्यानंतर पोलिसांनी सापळा लावून ठाकूर आणि साथीदारास ताब्यात घेतले.
