Fursungi News लोणी काळभोर : शालेय विद्यार्थिनीचा विनयभंग करणाऱ्या (Fursungi News) फुरसुंगी (ता. हवेली) येथील अट्टल गुन्हेगाराला हडपसर पोलिसांनी अमळनेर येथून अटक केली आहे. (Fursungi News)
प्रतीक उर्फ लक्या सतीश पाटील (वय १९ रा. त्रिमूर्ती विहार, भेकराईनगर, फुरसुंगी) असे अटक करण्यात आलेल्या आरोपींचे नाव आहे. याप्रकरणी मुलीच्या आईने हडपसर पोलीस ठाण्यात फिर्याद दिली होती.
पोलिसांनी दिलेल्या माहितीनुसार, तक्रारदार महिला या हडपसर भागात भाजी विक्री करतात. महिलेची चौदा वर्षांची मुलगी एका शाळेत शिकत आहे. मुलगी आईला भाजी विक्री व्यवसायात मदत करते.
दरम्यान, आरोपी पाटीलने या मुलीचा विनयभंग केला होता. त्यानंतर मुलीच्या आईने त्याला याचा जाब विचारला. तेव्हा आरोपीने मुलीच्या आईला भर रस्त्यात मारहाण केली आणि तो पसार झाला. याप्रकरणी मुलीच्या आईने हडपसर पोलीस ठाण्यात फिर्याद दिली होती. त्यानंतर आरोपी पाटील याच्याविरुद्ध विनयभंग, तसेच बाललैंगिक अत्याचार प्रतिबंध कायद्यान्वये गुन्हा दाखल करण्यात आला आहे.
हडपसर पोलीस ठाण्यात गुन्हा दाखल होताच, पोलीस उपनिरीक्षक प्रताप शेळके, हवालदार रामेश्वर नवले, समीर पांडुळे यांचे एक पथक आरोपीच्या मागावर होते. आरोपीचा शोध घेत असताना, पाटील हा अमळनेरमध्ये पसार झाल्याची माहिती पोलिसांना मिळाली होती. मिळालेल्या माहितीच्या अनुषंगाने पोलिसांनी सदर ठिकाणी सापळा रचून आरोपीला मोठ्या शिताफीने बेड्या ठोकल्या.
