Dehu Road | देहूरोड, (पुणे) : दरवाजाचा कडीकोयंडा उचकटून अज्ञात चोरट्यांनी सोन्याचे दागिने आणि रोख रक्कम असा ५० हजार रुपयांचा मुद्देमाल चोरून नेल्याची घटना देहूरोड परिसरातील विकासनगर येथे घडली आहे.
याप्रकरणी महादेव हरिभाऊ कडलग (वय-५५, रा. देहूरोड) यांनी याप्रकरणी देहूरोड पोलिस ठाण्यात फिर्याद दिली आहे. त्यानुसार, अज्ञात चोरट्यांच्या विरोधात गुन्हा दाखल केला आहे.
पोलिसांनी दिलेल्या माहितीनुसार, फिर्यादी त्यांच्या घरच्यांसोबत कपडे खरेदी करण्यासाठी बाहेर गेले. त्या वेळी त्यांचे घर कुलूप लाऊन बंद होते. दरम्यान, दीड तासानंतर फिर्यादी घरी आले असता त्यांच्या घराचा दरवाजाचा कोयंडा तुटलेला दिसला.
दरम्यान, घरात जाऊन पाहणी केली असता घरातून ३९ हजार ८५० रुपयांचे सोन्याचे दागिने आणि १० हजार रोख रक्कम चोरीला गेल्याचे उघडकीस आले. देहूरोड पोलिस तपास करीत आहेत.
