Crime : पंढरपूरच्या कुंभार गल्लीतील माय-लेकाच्या दुहेरी खून प्रकरणाचा सात महिन्यांनंतर झालेला उलगडा अक्षरशः थरारक चित्रपटालाही मागे टाकणारा ठरला आहे. 15 जुलै 2025 रोजी सुरेखा संजय जगताप (45) आणि त्यांचा मुलगा लखन संजय जगताप (24) यांची त्यांच्या घरात तलवारीने वार करून निर्घृण हत्या करण्यात आली होती. घर बंद अवस्थेत असल्याने आणि प्रत्यक्ष साक्षीदार नसल्याने पोलिसांसमोर तपासाचे मोठे आव्हान उभे राहिले होते.
या प्रकरणातील सर्वात धक्कादायक बाब म्हणजे, खुनाची माहिती देण्यासाठी पोलिसांना फोन करणारा आणि तपासात ‘मदत’ करण्याचा आव आणणारा व्यक्तीच या कटाचा मुख्य सूत्रधार निघाला. सुरुवातीपासूनच पोलिसांची दिशाभूल करण्याचा प्रयत्न झाला. घरातील टीव्ही गायब करून चोरीचा आभास निर्माण करण्यात आला होता. मात्र फॉरेन्सिक तपास, कॉल डिटेल रेकॉर्ड (CDR) विश्लेषण आणि मोबाईल लोकेशनच्या आधारे संशयाची सुई जवळच्या व्यक्तींवर फिरू लागली.
सोलापूरचे पोलीस अधीक्षक अतुल कुलकर्णी यांनी सांगितले की, घटनास्थळी मिळालेल्या तांत्रिक पुराव्यांमुळे तपासाला दिशा मिळाली. संशयिताच्या मोबाईलची लोकेशन, नवीन सिमकार्ड खरेदीचा तपशील आणि त्याच्या हालचालींचा मागोवा घेतल्यानंतर जाळे आवळले गेले. राजस्थानातील जोधपूर येथून एकाला, तर पंढरपूरमधून दोघांना ताब्यात घेण्यात आले. अटक केलेल्यांमध्ये एका अल्पवयीन मुलाचाही समावेश असून त्याची रवानगी बालसुधारगृहात करण्यात आली आहे.
प्राथमिक चौकशीत वैयक्तिक हेवेदावे, प्रेमसंबंध किंवा अनैतिक नातेसंबंधातून हा कट रचल्याची शक्यता व्यक्त होत आहे. आरोपींमध्ये मृतांचा चुलत भाऊही सहभागी असल्याचे समोर आले आहे.
सहाय्यक पोलीस अधीक्षक प्रशांत डगळे यांच्या मार्गदर्शनाखालील पथकाने सातत्याने पुरावे गोळा करत हा गुंता सोडवला. या उलगड्यामुळे स्थानिकांमध्ये दिलासा निर्माण झाला असला, तरी जवळच्या व्यक्तींनीच विश्वासघात केल्याची बाब समाजाला हादरवून सोडणारी आहे.
