चाकण : जबरदस्तीने घरात घुसून महिलेचा विनयभंग करून तिच्या वडिलांना बेदम मारहाण करणाऱ्या आरोपीला चाकण पोलिसांनी अटक केली आहे.
विजय मोहन राठोड (वय-३२, रा. खराबवाडी, चाकण) असे गुन्हा दाखल झालेल्या आरोपीचे नाव आहे. याप्रकरणी पीडित महिलेने सोमवारी (ता.२०) चाकण पोलीस ठाण्यात फिर्याद दिली आहे. सदर प्रकार हा रविवारी (ता.१९) रात्री पावणे दहाच्या सुमारास खेड तालुक्यातील नाणेकरवाडी येथे घडला आहे.
पोलिसांनी दिलेल्या माहितीनुसार, फिर्यादी या नाणेकरवाडी (ता. खेड) येथे कुटुंबासोबत राहतात. रविवारी रात्री पावणे दहाच्या सुमारास फिर्यादी महिला या घरामध्ये एकट्या असताना आरोपी विजय राठोड हा जबरदस्तीने घरात घुसला. आणि त्याने अश्लील बोलत महिलेसोबत गैरवर्तन केले. तसेच घरासमोर पडलेला दगड हातात घेऊन महिलेला मारहाण केली.
दरम्यान, आरोपी महिलेला मारहाण करीत असताना, फिर्यादीचे वडील भांडणे सोडवण्यासाठी गेले असता आरोपीने त्यांनाही हाताने मारहाण केली. तसेच घरातील सामानाची तोडफोड केली.
याप्रकरणी पीडित महिलेने चाकण पोलीस ठाण्यात फिर्याद दिली आहे. त्यानुसार आरोपी विजय राठोड याच्यावर आयपीसी ५०९, ३५४, ४५२, ३२४, ४२७, ५०, ५०६ नुसार गुन्हा दाखल करण्यात आला. गुन्हा दाखल होताच चाकण पोलिसांनी आरोपीला बेड्या ठोकल्या असून पुढील तपास पोलीस करीत आहेत.
