उरुळी कांचन : कार व टेम्पोचे समोरासमोर जोरदार धडक झाल्याची धक्कादायक घटना कोरेगाव मूळ (ता. हवेली) ग्रामपंचायत हद्दीतील पाण्याच्या टाकीजवळ आज सोमवारी (ता.31) रात्री आठ वाजण्याच्या सुमारास घडली आहे. या अपघातात भिवरी येथील दांपत्य गंभीर जखमी झाले आहे.
बाळासाहेब बारीकराव गोते (वय-४३) सुनीता बाळासाहेब गोते (वय-४२, दोघेही रा. बिवरी, तालुका हवेली जिल्हा पुणे) अशी जखमी झालेल्या दाम्पत्याची नावे आहेत.
मिळालेल्या माहितीनुसार, बाळासाहेब गोते व त्यांची पत्नी हे दोघेजण उरुळी कांचन कडून बिवरीच्या दिशेने त्यांच्या कारमध्ये चालले होते. तर प्रदीप महादू कावरे (वय-२१, व्यवसाय ड्रायव्हर) व मच्छिंद्र बबन कावरे (वय-३४, दोघेही राहणार फुगेवाडी तालुका पारनेर जिल्हा नगर) हे भिवरी कडून उरळीकांचनच्या दिशेने चालले होते.
दरम्यान, गोते व कावरे यांच्या गाड्या कोरेगाव मूळ ग्रामपंचायत हद्दीतील पाण्याच्या टाकी जवळ आल्या असता, दोन्ही गाड्यांची समोरासमोर भीषण धडक झाली.
या अपघातात गोते दाम्पत्य गंभीर जखमी झाले असून त्यांना उरुळी कांचन येथील खाजगी दवाखान्यात उपचारासाठी दाखल करण्यात आले आहे. तरी पुढील तपास लोणी काळभोर पोलीस करीत आहेत.
