पुणे : पुणे शहरातून सासवडला जात असलेल्या पीएमपी बसचा बोपदेव घाट उतरल्यानंतर अपघात झाला. यामुळे एकच खळबळ उडाली. यामध्ये १५ प्रवासी जखमी झाल्याची माहिती आहे.
मिळालेल्या माहिती नुसार, कात्रज आगारातून रविवारी (ता. १८) प्रवाशांना घेऊन पीएमपी बस सासवडच्या दिशेने निघाली होती. बोपदेव घाट उतरल्यावर पुढे सात-आठ किलोमीटर अंतरावर गराडे गावाजवळ बस आली असता, चालकाचे स्टेअरिंगवरील नियंत्रण सुटले आणि प्रवाशांसह बस रस्त्याशेजारील शेतात घुसली. बसमध्ये प्रवाशांची संख्या देखील जास्त होती.
दरम्यान, अपघात झाल्यानंतर पीएमपीच्या अधिकाऱ्यांनी घटनास्थळी जाऊन अपघात झालेल्या बसची पाहणी केली. जखमींना तत्काळ जवळील खासगी रुग्णालयात नेण्यात आले. बस घाटाच्या खाली आल्याने मोठी हानी टळली आहे.
