Accident News : शिरूर, (पुणे) : पुणे – नगर महामार्गावर भीमा नदी पुलावरील वळणावर चारचाकी चालकाचा गाडीवरील ताबा सुटून झालेल्या अपघातात दोघेजण गंभीर जखमी झाल्याची घटना घडली आहे. कोरेगाव भीमा (ता. शिरूर) हद्दीत रविवारी (ता. १६) पहाटे साडेतीन वाजण्याच्या सुमारास हा अपघात झाला आहे.
पन्नास ते साठ फूट खड्ड्यात ही गाडी पलटी झाली. मात्र, स्थानिक नागरिकांच्या मदतीने त्या गाडीतील तरुणांना ग्रामस्थांनी गाडीच्या काचा फोडून बाहेर काढले. तसेच गाडीच्या एअर बॅग वेळेत ओपन झाल्याने मोठी दुर्घटना टळली आहे.
ऋषिकेश यादव (वय ३५), एकनाथ शिंगाल (वय ३३) अशी अपघातात जखमी झालेल्या दोघांची नावे आहेत. त्यांना उपचारासाठी जवळच्या खाजगी रुग्णालयात दाखल करण्यात आले आहे.
मिळालेल्या माहितीनुसार, कोरेगाव भीमा येथे पुण्याकडून नगरकडे जाणाऱ्या बाजुने रात्री साडेतीनच्या सुमारास वेगाने एक चारचाकी गाडी निघाली होती. यावेळी वळणाचा अंदाज न आल्याने रस्त्याच्या उजव्या बाजूला वेगात पलटी झाली. मात्र, या गाडीच्या पुढील भागातील एअर बॅगा ओपन झाल्या होत्या. पलटी झालेल्या गाडीतील एका तरुणाची मान खिडकीच्या काचेत अडकली होती. यावेळी स्थानिक नागरिकांनी तातडीने मदत करत जखमी तरुणांचा जीव वाचवला.
दरम्यान, तरुणांना जखमी अवस्थेत रुग्णालयात दाखल करण्यासाठी स्थानिक नागरिकांनी १०८ क्रमांकावर फोन केला. मात्र तातडीने कोणतीही मदत मिळाली नाही. त्यांना यायला अर्धा पाऊण तासाचा उशीर झाला. असे स्थानिक नागरिकांकडून सांगण्यात आले.
