पंढरपूर : ऊसतोड कामगारांना घेऊन जाणारा ट्रॅक्टर करकंब (ता.पंढरपुर) परिसरात असलेल्या उजनी कालव्यात पडल्याची धक्कादायक घटना मंगळवारी (ता. १३) रात्री अकरा वाजण्याच्या सुमारास घडली आहे. या अपघातात ५ परप्रांतीय नागरिकांचा दुर्दैवी मृत्यू झाला आहे. या मृतांमध्ये दोन लहान मुले आणि तीन महिलांचा समावेश आहे.
मिळालेल्या माहितीनुसार, एक ट्रॅक्टर ऊसतोड मजुरांना घेऊन ऊस तोडणीसाठी फडात घेऊन जात होता. कामगारंना घेवून जात असताना, चालकाने ट्रॅक्टरवरील नियंत्रण सुटल्याने ट्रॅक्टर करकंब (ता.पंढरपुर) परिसरात असलेल्या उजनी कालव्यात पडला. यामध्ये पाच जणांचा मृत्यू झाला तर काही जण जखमी झाले आहेत.
दरम्यान, या घटनेची माहिती मिळताच पोलीस घटनास्थळी दाखल झाले. पोलिसांनी जखमी मजुरांना करकंब येथील रूग्णालयात उपचारासाठी दाखल केले आहे. हे सर्व ऊस तोडणी कामगार हे कोलकी (ता.वरला, जि. बडवानी, मध्य प्रदेश) येथील असून त्यांची ओळख पटवण्याचे काम सुरू आहे.
