पुणे : चाकण येथील औद्योगिक क्षेत्रातील एका नामांकित उद्योजकाने ऑडिशन घेण्याच्या बहाण्याने आई वडिलांना बाहेर काढून १३ वर्षीय अल्पवयीन मुलीवर बलात्कार केल्याची धक्कादायक घटना उघडकीस आली आहे. याप्रकणी पीडितेच्या आईने चाकण पोलीस ठाण्यात फिर्याद दिली. त्यानुसार आरोपी उद्योजकावर गुन्हा दाखल करण्यात आला आहे. गुन्हा दाखल होताच तो फरार झाला आहे.
राजेंद्र दगडु गायकवाड असे गुन्हा दाखल करण्यात आलेल्या आरोपी उद्योजकाचे नाव आहे.
पोलिसांनी दिलेल्या माहितीनुसार, आरोपी उद्योजक राजेंद्र गायकवाड याने पीडितेच्या आई वडिलांना पीडितेला फिल्म इंडस्ट्रीमध्ये काम देण्याचं अमिष दाखवलं. त्यानंतर तो ऑडिशन घेण्याच्या कारणावरून, पीडितेच्या घरी आला, आणि त्याने पीडितेच्या आई वडिलांना घरच्या बाहेर पाठवून दिले. त्यानंतर आरोपी राजेंद्र गायकवाड याने ऑडिशन घेण्याच्या बहाण्याने पीडित मुलीला कपडे उतरवायला लावले. पीडित मुलीने कपडे उतरवताच, आरोपीने तिच्या अज्ञानपणाचा फायदा घेत तिच्यावर बलात्कार केला.
याबाबत कुणाला सांगितल्यास जीवे मारण्याची धमकी सुद्धा त्याने पीडित मुलीला दिली. त्यानंतर आरोपी राजेंद्र गायकवाड पीडित मुलीला धमकी देऊन तेथून पसार झाला .या सर्व घटनेनंतर पीडित मुलगी घाबरली. तिने हा सर्व प्रकार आई-वडीलांना सांगितला. पीडितेच्या आई-वडीलांनी तातडीने चाकण पोलीस ठाण्यात फिर्याद दिली.
दरम्यान, याप्रकरणी पीडित मुलीच्या आईने दिलेल्या तक्रारीनुसार, पोलिसांनी आरोपी राजेंद्र दगडु गायकवाड याच्यावर पोस्को कायद्याअंतर्गत बलात्काराचा गुन्हा दाखल केला आहे. गुन्हा दाखल होताच, आरोपी राजेंद्र हा फरार झाला असून पोलीस त्याचा शोध घेत आहेत.
