पिंपरी चिंचवड : ऑफिसमध्ये एकट्या असलेल्या महिलेसोबत गैरवर्तन व विनयभंग करून संबंध न ठेवल्यास चेहऱ्यावर ॲसिड फेकण्याची धमकी दिल्याची घटना चिखली येथे घडली आहे. याप्रकरणी एकावर चिखली पोलिस ठाण्यात गुन्हा दाखल करण्यात आला आहे.
संजय उत्तम राठोड (रा. चिखली, प्राधिकरण) असे गुन्हा दाखल करण्यात आलेल्या आरोपीचे नाव आहे. याप्रकरणी पिडीत महिलेने बुधवारी (ता. १५) चिखली पोलिस ठाण्यात फिर्याद दिली.
पोलिसांनी दिलेल्या माहितीनुसार, फिर्यादी महिला आणि आरोपी एकाच ऑफिसमध्ये काम करतात. पिडीत महिला ऑफिसमध्ये एकटीच असताना आरोपीने तिच्याशी गैरवर्तन केले. तू मला खूप आवडतेस, असे म्हणून आरोपीने फिर्यादीचा विनयभंग केला. फिर्यादी महिलेने विरोध केला. याबाबत कोणाला सांगितले तर कंपनीत फ्रॉड केल्याची खोटी केस करून अडकवीन, अशी धमकी आरोपीने दिली.
दरम्यान, आरोपीने फिर्यादी महिलेचा पाठलाग केला. तू मला खूप आवडतेस, तू माझ्यासोबत संबंध ठेवले नाहीस, तर मी तुला रस्त्यामध्ये गाठून तुझ्या तोंडावर ॲसिड फेकीन, अशी धमकी दिली. त्यासोबतच वेळोवेळी फिर्यादी यांचा पाठलाग केला.
त्यानंतर पिडीत महिलेने चिखली पोलीस ठाण्यात फिर्याद दिली. त्यानुसार आरोपी संजय उत्तम राठोड याच्यावर गुन्हा दाखल करण्यात आला असून या घटनेचा पुढील तपास चिखली पोलीस करीत आहेत.
