पुणे : अतिक्रमण केल्याची तक्रार पिंपरी चिंचवड महानगरपालिकेत केल्याच्या रागातून एकाला लोखंडी रॉडने बेदम मारहाण करून गंभीर जखमी केल्याची घटना समोर आली आहे. ही घटना दापोडी येथे बुधवारी (ता.१८ ) सकाळी साडेदहाच्या सुमारास बॉम्बे कॉलनी येथे घडली आहे. याप्रकरणी एकावर भोसरी पोलीस ठाण्यात गुन्हा दाखल करण्यात आला आहे.
ऋषिकेश इंद्रभान साखरे (रा. महादेव आळी, सातकर चाळ, दापोडी) असे गुन्हा दाखल करण्यात आलेल्या व्यक्तीचे नाव आहे. तर, किशोर वसंत काटे (वय-४० रा. गणेश कॉर्नर, दापोडी) असे फिर्याद दिलेल्या व्यक्तीचे नाव आहे.
पोलिसांनी दिलेल्या माहितीनुसार, फिर्यादी किशोर काटे यांचा कन्स्ट्रक्शन व्यवसाय आहे. आरोपी ऋषिकेश साखरे याने गुरांचा गोठा हा रस्त्यावर वाढवून अतिक्रमण केले होते. यासंदर्भात किशोर काटे यांनी पिंपरी चिंचवड महानगरपालिकेत तक्रारी अर्ज केला होता.
आरोपी ऋषिकेश साखरे याला तक्रार दिल्यावर राग आला. त्यानंतर त्याने फिर्यादी यांच्या डोक्यात, कानावर लोखंडी रॉडने मारुन त्यांना गंभीर जखमी केले. यानंतर किशोर काटे यांनी याप्रकणी भोसरी पोलीस ठाण्यात फिर्याद दिली.
त्यानुसार आरोपी ऋषिकेश साखरे याच्याविरोधात गुन्हा दाखल करण्यात आला असून या घटनेचा पुढील तपास पोलीस करीत आहेत.
