Weather News: राज्यात पुन्हा एकदा पावसाने जोरदार कमबॅक केले असून, बंगालच्या उपसागरात तयार झालेल्या कमी दाबाच्या पट्ट्यामुळे २९ ते ३१ जुलै दरम्यान महाराष्ट्रातील अनेक भागांत पावसाचा जोर तीव्र होण्याची शक्यता आहे. हवामान विभागाने दिलेल्या अंदाजानुसार, विदर्भ, उत्तर मराठवाडा, खानदेश, कोकण आणि मध्य महाराष्ट्राच्या घाट परिसरात मुसळधार ते अतिमुसळधार पाऊस कोसळू शकतो.
पुणे शहराचे हवामान
पुणे शहर आणि घाट परिसरात गेल्या काही तासांपासून पावसाचा जोर कायम असून, हवामान विभागाने पुढील तीन दिवस शहरात हलक्या ते मध्यम स्वरूपाच्या सरींसह काही ठिकाणी मुसळधार पावसाचा अंदाज वर्तवला आहे. विशेषतः घाट परिसरात पावसाची तीव्रता अधिक राहण्याची शक्यता असल्याने प्रशासनाकडून नागरिकांना आणि पर्यटकांना सतर्क राहण्याचे आवाहन करण्यात आले आहे. सततच्या पावसामुळे हवामानात गारवा निर्माण झाला असून सखल भागात पाण्याचे साचणे टाळण्यासाठी महापालिका यंत्रणा सज्ज ठेवण्यात आली आहे.
विदर्भात पावसाचा हाहाकार, शाळांना सुट्टी जाहीर
विशेषतः विदर्भातील नागपूर, चंद्रपूर, गडचिरोली आणि गोंदिया या जिल्ह्यांमध्ये पावसाने अक्षरशः झोडपून काढले आहे. नागपूर शहरात गेल्या काही तासांत झालेल्या मुसळधार पावसामुळे सखल भागात मोठ्या प्रमाणावर पाणी साचले असून जनजीवन विस्कळीत झाले आहे. विद्यार्थ्यांच्या सुरक्षेचा विचार करून नागपूर शहर आणि ग्रामीण भागातील शाळा व महाविद्यालयांना सुट्टी जाहीर करण्यात आली आहे. प्रशासनाकडून नागरिकांना सतर्क राहण्याचे आवाहन करण्यात आले आहे.
आगामी ३ दिवसांचे हवामान अंदाज
-
३० जुलै: या दिवशी पश्चिम विदर्भ, खानदेश, उत्तर मराठवाडा, कोकण आणि मध्य महाराष्ट्राच्या घाट परिसरात पावसाची तीव्रता अधिक राहण्याची शक्यता आहे. रायगड, ठाणे आणि पालघर जिल्ह्यातही मुसळधार पाऊस पडू शकतो.
-
३१ जुलै: यादरम्यान खानदेश आणि मध्य महाराष्ट्रातील घाट भागात पावसाचा प्रभाव कायम राहण्याचा अंदाज आहे.
मुसळधार पावसामुळे नद्या-नाल्यांच्या पाणीपातळीत वाढ होऊ शकते तसेच घाट परिसरात दरड कोसळण्याची शक्यता नाकारता येत नाही. त्यामुळे प्रवाशांनी आणि नागरिकांनी काळजी घ्यावी, असे आवाहन प्रशासनाकडून करण्यात आले आहे.
