मुंबई : बंगालच्या उपसागरात निर्माण झालेले ‘अक्वान’ चक्रीवादळ किनारपट्टीच्या दिशेने वेगाने पुढे सरकत असल्याने अनेक राज्यांमध्ये हवामान बदलण्याची शक्यता आहे. या वादळाचा परिणाम आंध्र प्रदेश, ओडिशा, तेलंगणा यांसह दक्षिण आणि मध्य भारतातील काही भागांमध्ये जाणवू शकतो. महाराष्ट्रातील विदर्भातही काही ठिकाणी हलक्या पावसाचा अंदाज व्यक्त करण्यात आला आहे.

हवामान विभागाच्या अंदाजानुसार, हे चक्रीवादळ उत्तर दिशेने सरकत असून ओडिशातील गोपाळपूरजवळ किनारपट्टीवर धडकण्याची शक्यता आहे. नरसापूर ते पुरी या किनारपट्टीच्या परिसरात वादळाचा प्रभाव जाणवू शकतो. किनाऱ्यावर पोहोचताना वाऱ्यांचा वेग ताशी 90 ते 100 किलोमीटरपर्यंत जाण्याचा अंदाज आहे. त्यामुळे समुद्रकिनारी राहणाऱ्या नागरिकांनी काळजी घेण्याचे आवाहन करण्यात आले आहे.
या वादळामुळे तमिळनाडू, आंध्र प्रदेश, ओडिशा, तेलंगणा, छत्तीसगड, झारखंड, रायलसीमा आणि मध्य प्रदेशातील काही भागांत पाऊस पडण्याची शक्यता आहे. काही ठिकाणी हलक्या, तर काही भागांत जोरदार सरी कोसळू शकतात. विदर्भातील काही जिल्ह्यांमध्येही हलक्या पावसाची शक्यता वर्तवण्यात आली आहे.

समुद्रात उंच लाटा निर्माण होण्याची शक्यता लक्षात घेता मच्छीमारांना खोल समुद्रात न जाण्याचा सल्ला देण्यात आला आहे. किनारपट्टीवरील नागरिकांनीही हवामान विभागाच्या सूचनांकडे लक्ष ठेवावे, असे आवाहन करण्यात आले आहे.
दरम्यान, महाराष्ट्रातही तापमानात चढ-उतार सुरू आहेत. काही भागांत ढगाळ वातावरण राहण्याची शक्यता असताना राज्यातील काही शहरांमध्ये थंडीचा जोर वाढला आहे. धुळे येथे 10.4 अंश सेल्सिअस तापमानाची नोंद झाली. यवतमाळमध्ये 11.4, गोंदियात 12.2, जेऊरमध्ये 12.5, जळगावमध्ये 12.6, तर वर्धा येथे 12.8 अंश सेल्सिअस तापमान नोंदवण्यात आले. त्यामुळे राज्यात काही ठिकाणी थंडी, तर विदर्भात पावसाचे सावट असे संमिश्र वातावरण पाहायला मिळत आहे.






