अहिल्यानगर: अहिल्यानगर जिल्ह्यातील श्रीरामपूर (Ahilyanagar News) येथे तोतया पोलीस बनून नागरिकांची फसवणूक करणाऱ्या टोळीचा पर्दाफाश (Shrirampur News) करण्यात पोलिसांना यश आले आहे. स्थानिक गुन्हे शाखेने 47 वर्षीय सज्जाद गरीबशाह इराणी याला अटक केली असून, तो महाराष्ट्रातील विविध शहरांमध्ये स्वतःला पोलीस अधिकारी असल्याचे भासवून लोकांना गंडा घालत असल्याचे तपासात उघड झाले आहे. (Latest Marathi News)
या प्रकरणाची सुरुवात 9 ऑगस्ट 2025 रोजी झालेल्या एका फसवणुकीच्या घटनेतून झाली. सावेदी परिसरातील जॉगिंग पार्कजवळ उभ्या असलेल्या रविंद्र राजहंस यांच्याशी संपर्क साधून दोन व्यक्तींनी स्वतःला पोलीस अधिकारी असल्याचे सांगितले आणि त्यांची फसवणूक केली. आपल्यासोबत फसवणूक झाल्याचे लक्षात येताच त्यांनी तोफखाना पोलीस ठाण्यात तक्रार दाखल केली होती.
या तक्रारीच्या आधारे तपास सुरू असताना सज्जाद इराणी याच्यापर्यंत पोलिसांचा मागोवा पोहोचला. त्याला श्रीरामपूर येथून अटक करण्यात आली. चौकशीत त्याने आपल्या भावासह, मुस्लिम यासीन इराणी, याच्यासोबत मिळून हा गुन्हा केल्याची कबुली दिली आहे. या दोघांनी तोफखाना आणि संगमनेर शहर पोलीस ठाण्यांच्या हद्दीतही अशाच प्रकारचे गुन्हे केल्याचे समोर आले आहे.
तपासात आणखी एक महत्त्वाची बाब उघड झाली आहे. या टोळीविरोधात मुंबई, जळगाव, पुणे, पिंपरी-चिंचवड आणि छत्रपती संभाजीनगरसह विविध ठिकाणी गुन्हे नोंदवले गेले आहेत. म्हणजेच ही फसवणूक एखाद्या ठिकाणी मर्यादित नसून राज्यभर पसरलेल्या साखळीचा भाग असल्याचे स्पष्ट झाले आहे.
सध्या सज्जाद इराणी पोलिसांच्या ताब्यात असून त्याच्या भावाचा शोध सुरू आहे. या प्रकरणात आणखी कोणी सहभागी आहे का, याचाही तपास सुरू आहे. पोलिसांनी नागरिकांना आवाहन केले आहे की, स्वतःला पोलीस अधिकारी सांगणाऱ्या कोणत्याही अनोळखी व्यक्तीवर लगेच विश्वास ठेवू नये आणि संशयास्पद प्रकार आढळल्यास त्वरित तक्रार करावी.
