सातारा : खास मित्राच्या अपघाती मृत्यूचा मानसिक धक्का सहन न झाल्याने विद्यार्थिनीने आत्महत्या केल्याची दुर्दैवी घटना साताऱ्यात समोर आली आहे. पूजा माने असे मृत विद्यार्थिनीचे नाव असून, ती खटाव तालुक्यातील मानेवाडी येथील रहिवासी होती. साताऱ्यातील यशोदा टेक्निकल कॅम्पसच्या वसतिगृहात ही घटना घडली. या प्रकरणामुळे शैक्षणिक परिसरात हळहळ व्यक्त केली जात आहे.
मिळालेल्या माहितीनुसार, पूजा शिक्षणासाठी घरापासून दूर साताऱ्यात राहत होती. काही दिवसांपूर्वी ती आपल्या खास मित्रासोबत कोल्हापूर येथील श्री महालक्ष्मी देवीच्या दर्शनासाठी गेली होती. दर्शन घेऊन परतत असताना त्यांच्या स्कॉर्पिओ गाडीला भीषण अपघात झाला. या दुर्घटनेत तिच्या मित्राचा जागीच मृत्यू झाला. या घटनेचा पूजाला मोठा मानसिक धक्का बसल्याचे सांगितले जात आहे.
जवळच्या मित्राचा अचानक मृत्यू झाल्याने पूजा मानसिकदृष्ट्या खचली होती. या घटनेनंतर ती दुःखातून सावरू शकली नसल्याची माहिती समोर आली आहे. मित्राच्या मृत्यूचा आघात आणि त्याच्या आठवणींमुळे ती अस्वस्थ होती, असे सांगण्यात येत आहे.
दरम्यान, साताऱ्यातील यशोदा टेक्निकल कॅम्पसच्या वसतिगृहात पूजाने गळफास घेऊन आत्महत्या केल्याचे उघड झाले. या घटनेची माहिती मिळताच परिसरात खळबळ उडाली. शिक्षणासाठी घरापासून दूर राहणाऱ्या तरुणीच्या मृत्यूमुळे तिच्या कुटुंबीयांवर दुःखाचा डोंगर कोसळला आहे.
या घटनेची नोंद सातारा तालुका पोलीस ठाण्यात करण्यात आली आहे. पोलिसांकडून या प्रकरणाचा पुढील तपास सुरू असून, विद्यार्थिनीच्या मृत्यूशी संबंधित परिस्थितीची माहिती घेतली जात आहे. मित्राच्या अपघाती मृत्यूनंतर पूजाची मानसिक अवस्था कशी होती आणि या घटनेमागील नेमकी परिस्थिती काय होती, याबाबत तपासातून अधिक माहिती समोर येण्याची अपेक्षा आहे.
