Nagpur : नागपूरच्या सक्करदरा परिसरात रविवारी सकाळी घडलेल्या एका दुर्घटनेने शहर हादरून गेले. नागपूर महानगरपालिकेच्या कचरा संकलनासाठी वापरण्यात येणाऱ्या घंटा गाडीवर काम करत असताना कचऱ्याचा संपूर्ण डाला अचानक अंगावर कोसळल्याने एका कंत्राटी सफाई कामगाराचा दुर्दैवी मृत्यू झाला. सिद्धार्थ ऊर्फ सिद्धू घोडके (वय ३९, रा. अजनी) असे मृत कामगाराचे नाव आहे.
नेहरू नगर झोनअंतर्गत बुधवार बाजार परिसरात सिद्धार्थ घोडके हे रविवारी सकाळी कर्तव्यावर होते. ए.जी. एन्व्हिरो प्रा. लि. या खासगी कंत्राटी कंपनीकडून चालवण्यात येणाऱ्या कचरा गाडीवर ते कार्यरत होते. कचरा उचलण्याचे काम सुरू असताना गाडीच्या हायड्रोलिक प्रणालीत बिघाड झाला आणि दुरुस्ती दरम्यान अचानक डाला सुटून थेट त्यांच्या अंगावर कोसळला. डोक्याला जबर मार बसल्याने ते कचऱ्याखाली दबले गेले. (Nagpur)
सहकाऱ्यांनी तातडीने त्यांना मेडिकल कॉलेजच्या ट्रॉमा सेंटरमध्ये दाखल केले, मात्र डॉक्टरांनी त्यांना मृत घोषित केले. या घटनेने सफाई कामगारांमध्ये तीव्र संताप उसळला आहे. सिद्धार्थ यांच्या पश्चात आई, पत्नी आणि दोन अल्पवयीन मुली असून कुटुंबाचा एकमेव कमावता आधार हरपला आहे.
कामगार संघटना आणि नातेवाईकांनी कंत्राटी कंपनीवर गंभीर आरोप केले आहेत. अनेक कचरा गाड्यांचा विमा नसणे, वारंवार तांत्रिक बिघाड होणे आणि हायड्रोलिक यंत्रणेबाबत आधी तक्रारी असूनही दुर्लक्ष केल्याचा आरोप करण्यात आला आहे. या निष्काळजीपणामुळेच हा मृत्यू ओढवला, असा आरोप आंदोलकांचा आहे.
घटनेनंतर संतप्त कामगार आणि नातेवाईकांनी सक्करदरा पोलीस ठाण्यात ठिय्या आंदोलन केले. कंत्राटी कंपनीवर सदोष मनुष्यवधाचा गुन्हा दाखल करावा, मृताच्या कुटुंबाला तातडीने २५ लाख रुपयांची मदत द्यावी आणि पत्नीला नोकरी द्यावी, अशी मागणी करण्यात आली आहे. ही घटना केवळ अपघात नसून, शहरातील कंत्राटी कामगारांच्या सुरक्षिततेचा गंभीर प्रश्न पुन्हा एकदा समोर आणणारी आहे.
