गोंदिया : सडक अर्जुनी तालुक्यात एका भाड्याच्या घरात राहणाऱ्या अल्पवयीन मुलीचा शेजारी राहणाऱ्या आरोपीने अश्लील चाळे करून विनयभंग केल्याची घटना २४ सप्टेंबर रोजी सकाळी १० वाजता घडली. याप्रकरणी पोलिसांनी आरोपीला अटक केली. सुरेश हरणे (६१, रा. सौंदड) असे आरोपीचे नाव आहे.
पीडित मुलगी एका शाळेत शिक्षण घेत असून आरोपीच्या घराशेजारी भाड्याच्या घरात राहते. घटनेच्या वेळी घरावर माकडं आल्याचे सांगून त्यांना हाकलून लावण्याच्या बहाण्याने आरोपीने पीडितेच्या घरात प्रवेश केला. पीडिता एकटी असल्याचे पाहून तिच्याशी त्याने अश्लील चाळे केले. छेड काढून विनयभंग केला. पीडितेने आरडाओरड केल्याने आरोपीने तिथून पळ काढला. पीडितेने डुग्गीपार पोलीस ठाणे गाठून आरोपीविरोधात तक्रार नोंदविली. याप्रकरणी डुग्गीपार पोलिसांनी आरोपी सुरेश हरणेविरोधात बीएनएस कलम ७५ (२) ३३२ (सी) पोस्को कलम ८ अन्वये गुन्हा नोंद करून अटक केली. पुढील तपास साहय्यक पोलीस निरीक्षक बांबोडे करीत आहेत.
न्यायालयीन कोठडीत रवानगी
तक्रारीच्या आधारे पोलिसांनी केलेल्या चौकशीतून आरोपी सुरेश हरणे यास २४ सप्टेंबर रोजी रात्री अटक करून २५ सप्टेंबर रोजी गोंदिया येथील जिल्हा सत्र न्यायालयात हजर केले असता न्यायालयाने ८ ऑक्टोबरपर्यंत न्यायालयीन कोठडी ठोठावून आरोपीची भंडारा येथील कारागृहात रवानगी केली.
