Crime News: बुलढाणा : बुलढाणा जिल्ह्यातील जळगाव (Jalgoan) जामोद पोलीस ठाण्याच्या हद्दीत काही दिवसांपूर्वी घडलेल्या शिक्षिकेच्या मृत्यू (Death) प्रकरणात धक्कादायक सत्य समोर आले आहे. सुरुवातीला हा प्रकार साधा रस्ते अपघात असल्याचे मानले जात होते. मात्र पोलिसांच्या तपासात हा अपघात नसून नियोजनबद्ध खून (Murder) असल्याचे स्पष्ट झाले आहे. विशेष म्हणजे या हत्येमागे शिक्षिकेच्या पतीचाच हात असल्याचे उघड झाले आहे.
मिळालेल्या माहितीनुसार, 2 मार्च रोजी पातुर्डा येथे राहणाऱ्या शिक्षिका वृषाली गावंडे या नेहमीप्रमाणे पिंपळगाव काळे येथील शाळेत जाण्यासाठी सकाळी घरातून दुचाकीवरून निघाल्या होत्या. त्या कवठळ गावाजवळ पोहोचल्या असताना एका मालवाहू वाहनाने त्यांच्या दुचाकीला जोरदार धडक दिली. या धडकेत त्यांचा जागीच मृत्यू झाला. या घटनेनंतर पोलिसांनी अपघाती मृत्यूची नोंद करून तपास सुरू केला होता.
मात्र या घटनेबाबत मृत शिक्षिकेच्या नातेवाईकांना संशय वाटू लागला. त्यांनी पोलिसांकडे यामध्ये घातपात असू शकतो अशी तक्रार केली. त्यानंतर पोलिसांनी या प्रकरणाचा सखोल तपास सुरू केला. तांत्रिक पुरावे, मोबाईल कॉल रेकॉर्ड आणि इतर माहितीच्या आधारे तपास पुढे नेण्यात आला. तपासादरम्यान हा अपघात मुद्दाम घडवून आणण्यात आल्याचे स्पष्ट झाले.
पोलिसांच्या तपासात समोर आले की शिक्षिका वृषाली गावंडे यांच्या पती प्रकाश गावंडे यांनीच पत्नीच्या हत्येचा कट रचला होता. त्याने आपल्या मित्र मंगेश चौहुलकर याच्या मदतीने वाहन चालक मनीष सूर्यवंशी याला 1 लाख रुपयांची सुपारी दिली होती. या पैशाच्या मोबदल्यात मालवाहू वाहनाने दुचाकीला धडक देऊन हा खून करण्यात आला.
या प्रकरणी पोलिसांनी प्रकाश गावंडे, मंगेश चौहुलकर आणि वाहन चालक मनीष सूर्यवंशी या तिघांना अटक केली आहे. तसेच गुन्ह्यात वापरलेले वाहन आणि सुपारीची रक्कमही जप्त करण्यात आली आहे. पत्नीचा जीव घेण्यासाठी पतीनेच असा कट रचल्याची घटना समोर आल्याने बुलढाणा जिल्ह्यात मोठी खळबळ उडाली आहे.
