Ration Card E-KYC : नवी दिल्ली: रेशन कार्डधारकांसाठी एक महत्त्वाची माहिती समोर आली आहे. जर तुम्ही रेशन कार्डाच्या माध्यमातून मोफत धान्याचा लाभ घेत असाल, तर ही बातमी तुमच्यासाठी अत्यंत आवश्यक आहे. केंद्र सरकारकडून रेशन कार्डाशी संबंधित ई-केवायसी (E -KYC) प्रक्रिया पूर्ण करणे अनिवार्य करण्यात आले आहे. 31 डिसेंबर 2025 पूर्वी ही प्रक्रिया पूर्ण न केल्यास 1 जानेवारी 2026 पासून मोफत रेशनचा लाभ बंद होऊ शकतो. त्यामुळे सर्व लाभार्थ्यांनी वेळेत आपली ई-केवायसी पूर्ण करावी, असे आवाहन करण्यात आले आहे.
अनेक रेशन कार्डधारकांना आपली ई-केवायसी पूर्ण झाली आहे की नाही, याची माहिती नसते. मात्र ई-केवायसी अपूर्ण असल्यास केवळ मोफत धान्यच नव्हे, तर रेशन कार्डशी जोडलेल्या इतर सरकारी योजनांचाही लाभ मिळणार नाही. शासनाकडून अपात्र लाभार्थ्यांना वगळण्यासाठी आणि व्यवस्थेत पारदर्शकता आणण्यासाठी ही मोहीम राबवली जात आहे.
रेशन कार्डाची ई-केवायसी स्थिती तपासण्यासाठी लाभार्थी घरबसल्या मोबाईलवरून ही प्रक्रिया करू शकतात. यासाठी सर्वप्रथम ‘Mera Ration’ हे अॅप मोबाईलमध्ये डाऊनलोड करावे लागते. त्यानंतर आधार क्रमांक किंवा रेशन कार्ड क्रमांक टाकून लॉगिन करावे. आधारशी जोडलेल्या मोबाईलवर आलेला ओटीपी टाकल्यानंतर राज्य आणि जिल्हा निवडावा. त्यानंतर ‘Manage Family Detail’ किंवा ‘Know Your Entitlement’ या पर्यायावर क्लिक केल्यावर ई-केवायसी स्टेटस दिसते. नावासमोर ‘Y’ असल्यास ई-केवायसी पूर्ण असून ‘N’ असल्यास ती अपूर्ण असल्याचे समजते.
मोबाईल वरून ई- केवायसी पूर्ण करा
जर ई-केवायसी पूर्ण नसेल, तर मोबाईलवरून ती करता येते. यासाठी ‘Mera e-KYC’ आणि ‘Aadhaar FaceRD’ ही अॅप्स डाऊनलोड करावी लागतात. त्यामध्ये राज्याची माहिती भरून कुटुंब प्रमुखाचा आधार क्रमांक किंवा रेशन कार्ड क्रमांक टाकावा. ओटीपी आल्यानंतर फेस ई-केवायसीसाठी कॅमेरा सुरू होतो. कुटुंबातील सर्व सदस्यांचा चेहरा स्कॅन केल्यानंतर ही प्रक्रिया पूर्ण होते.
वेळेत ई-केवायसी न केल्यास मोफत रेशन बंद होण्याची शक्यता असल्याने सर्व रेशन कार्डधारकांनी ही प्रक्रिया तातडीने पूर्ण करावी, असे आवाहन करण्यात आले आहे.
