Nanded Crime : नांदेड : शहरातील कॅनाल रोड परिसरात शुक्रवारी मध्यरात्री गँगवॉरमधून तिहेरी हत्याकांड घडल्याची धक्कादायक घटना समोर आली आहे. या रक्तरंजित घटनेत तीन जणांचा मृत्यू झाला असून पाच जण जखमी झाले आहेत. या प्रकारामुळे संपूर्ण नांदेड जिल्ह्यात भीती आणि तणावाचे वातावरण निर्माण झाले आहे.
मिळालेल्या माहितीनुसार, अर्जित सिंग चव्हाण, मोहम्मद अरबाज आणि सय्यद आवेझ अशी मृतांची नावे आहेत. अर्जित सिंग चव्हाण हा स्थानिक गुन्हेगारी टोळीशी संबंधित असल्याची माहिती समोर आली आहे. तर मोहम्मद अरबाज आणि सय्यद आवेझ हे प्रतिस्पर्धी गटाशी संबंधित असल्याचे सांगितले जात आहे.
पोलिसांच्या माहितीनुसार, दोन गटांमध्ये मागील काही महिन्यांपासून वाद सुरू होता. या वादातूनच ही घटना घडल्याचे प्राथमिक तपासात दिसून आले आहे. शुक्रवारी रात्री अर्जित सिंग आपल्या मित्रासह दुचाकीवरून जात असताना त्याच्यावर काही जणांनी तलवारीने हल्ला केला. या हल्ल्यात अर्जितचा जागीच मृत्यू झाला.
यानंतर अर्जितसोबत असलेल्या साथीदारांनी प्रतिहल्ला करत मोहम्मद अरबाजवर चाकू आणि इतर धारदार शस्त्रांनी वार केले. यात अरबाजचाही मृत्यू झाला. या घटनेनंतर आणखी एका ठिकाणी सय्यद आवेझ याच्यावर हल्ला होऊन त्याचा मृत्यू झाला.
या संपूर्ण घटनेत पाच जण जखमी झाले असून त्यांच्यावर उपचार सुरू आहेत. पोलिसांनी आतापर्यंत सात ते आठ संशयितांना ताब्यात घेतले आहे. या प्रकरणाचा पुढील तपास सुरू असून दोन्ही गटांतील वादाचे कारण शोधले जात आहे.
या तिहेरी हत्याकांडामुळे शहरात खळबळ उडाली असून नागरिकांमध्ये भीतीचे वातावरण निर्माण झाले आहे.
