मनमाड : मनमाडमधून एक धक्कादायक घटना समोर आली आहे. जुन्या वादातून माजी नगरसेविकेच्या मुलाची हत्या करण्यात आल्याची घटना घडली आहे. ही घटना मनमाड येथील पांडुरंग नगर भागात शनिवारी (दि. ०३) रात्रीच्या सुमारास घडली आहे. शुभम देविदास पगारे असे हत्या करण्यात आलेल्या युवकाचे नाव आहे.
याबाबत अधिक माहिती अशी की, मयत शुभम पगारे याचे काही दिवसांपूर्वी काही तरुणांसोबत वाद झाले होते. त्याचा राग मनात धरून शुभमवर धारदार शस्त्राने वार करण्यात आले. या हल्ल्यात शुभम गंभीर जखमी झाला होता. त्याला नाशिकला उपाचारासाठी दाखल करण्यात आले होते. मात्र, उपचारादरम्यान त्याचा मृत्यू झाला. या घटनेने मनमाडमध्ये तणावाचे वातावरण निर्माण झाले आहे.
शुभम माजी नगरसेविका नूतन पगारे यांचा मुलगा होता. पोलिसांनी खबरदारी म्हणून मयत शुभम व हल्लेखोराच्या निवासस्थान परिसरात मोठा बंदोबस्त तैनात करण्यात आला आहे. दरम्यान, शुभमच्या मृत्यूची माहिती मिळताच नातेवाईक व स्थानिक नागरिकांनी पोलीस स्थानकात धाव घेत जोपर्यंत मारेकऱ्यांना अटक होत नाही तोपर्यंत मृतदेहाचे अंत्यसंस्कार करणार नाही, असा आक्रमक पवित्रा घेतला होता.
तर शुभमचा जीव वाचला असता
राजकीय नेत्याच्या दाबावामुळे खोटे गुन्हे दाखल करतात, आणि खरे गुन्हेगार मोकाट राहतात. पोलिसांनी वेळीच हस्तक्षेप केला असता तर शुभमचा जीव वाचला असता, असा आरोप नातेवाईकांनी केला होता. मुख्य आरोपीला अटक करण्याची मागणी करत जवळपास अडीच तास नातेवाईकांनी मृतदेहासह भर पावसात ठिय्या आंदोलन केले. अखेर पोलिसांनी मारेकऱ्यावर गुन्हा दाखल करून अटक करण्याचे आश्वासन दिल्यानंतर आंदोलन मागे घेत सायंकाळी शुभमवर अंत्यसंस्कार करण्यात आले. पुढील तपास पोलीस करत आहेत.
