लहू चव्हाण
पाचगणी : पर्यटन नगरी पाचगणी येथील व्यापारी संघटनेचे अध्यक्ष मेहुल किशोर पुरोहित यांची भारतीय जनता पार्टीच्या पाचगणी शहराध्यक्षपदी निवड झाली आहे.
प्रत्येक शहर आणि जिल्ह्याला आगामी स्थानिक स्वराज्य संस्थांच्या निवडणुकांचे वेध लागले आहेत. आगामी नगरपालिका निवडणुकांच्या पार्श्वभूमीवर संघटनात्मकदृष्ट्या काम करण्याच्या दृष्टीने पुरोहित यांची निवड करण्यात आली आहे. भाजपचे महाबळेश्वर तालुकाध्यक्ष अनिल (नाना) भिलारे यांनी मेहुल पुरोहित यांची नियुक्ती केली आहे. जिल्हा अध्यक्ष धैर्यशील कदम यांच्या हस्ते हे नियुक्तीपत्र पुरोहित यांना देण्यात आले.
पुस्तकांचे गाव भिलार येथील सुमन मोटल हॉटेलच्या सभागृहात झालेल्या या कार्यक्रमास माजी आमदार मदन भोसले, जिल्हा सरचिटणीस विठ्ठल बलशेठवार, जिल्हा उपाध्यक्ष तानाजी भिलारे, अजय मांढरे, कामगार आघाडी जिल्हाध्यक्ष तेजस जमदाडे, तालुका संयोजक मंगेश उपाध्याय, किसान मोर्चा जिल्हा उपाध्यक्ष संतोष कवी, अलंकार सुतार आदी उपस्थित होते.
आगामी निवडणुका लक्षात घेऊन त्यांची ही निवड झाल्याने त्याला विशेष महत्त्व आहे. मेहुल पुरोहित यांच्यावर सर्व स्तरांतून अभिनंदनाचा वर्षाव होत आहे. या वेळी बोलताना तालुकाध्यक्ष अनिल भिलारे म्हणाले की, मेहुल पुरोहित यांच्या संघटनात्मक आणि सामाजिक कार्याची दखल घेऊन शहाराध्यक्षपदाची जबाबदारी त्यांच्यावर टाकली आहे. यामुळे भारतीय जनता पार्टीचे पाचगणीमधील संगटण बळक होईल, याची खात्री आहे.
