Crime News: जळगाव : जळगाव जिल्ह्यातील भुसावळ तालुक्यात प्रेमविवाह केल्याच्या कारणावरून एका 25 वर्षीय तरुणावर अमानुष अत्याचार केल्याची धक्कादायक घटना समोर आली आहे. या प्रकरणात काही जणांनी तरुणाला बेदम मारहाण करत त्याची नग्न धिंड काढली तसेच त्याच्या पत्नीला जबरदस्तीने घेऊन गेल्याची माहिती समोर आली आहे. या घटनेनंतर परिसरात भीतीचे वातावरण निर्माण झाले आहे.
मिळालेल्या माहितीनुसार, खडका येथील चेतन दिलीप जंगले या तरुणाने 18 वर्षीय तरुणीसोबत प्रेमविवाह केला होता. हा त्याचा दुसरा विवाह होता. या विवाहामुळे मुलीच्या नातेवाईकांमध्ये संताप होता. शुक्रवारी 20 मार्च रोजी सकाळी सुमारे 11.30 वाजता चेतन आपल्या पत्नीसह नातेवाईकांच्या घरी गेला असताना काही जणांनी तिथे येत वाद सुरू केला. सुरुवातीला धमक्या देण्यात आल्या आणि त्यानंतर चेतन व त्याच्या पत्नीवर मारहाण करण्यात आली.
या हल्ल्यात संशयितांनी चेतनचा गळा आवळण्याचा प्रयत्न केला. जीव वाचवण्यासाठी तो पळण्याचा प्रयत्न करत असताना त्याला पकडून एका डेअरीजवळ नेण्यात आले. तिथे त्याचे कपडे काढून त्याला मारहाण करण्यात आली. तसेच जबरदस्तीने काही गोष्टी बोलण्यास भाग पाडले. यानंतर आरोपींनी त्याला दुचाकीवर बसवून गावातील बसस्थानकापर्यंत नेले आणि त्याची धिंड काढली.
या घटनेत चेतन गंभीर जखमी झाला असून त्याचा हात मोडला आहे. सध्या त्याच्यावर जळगाव येथील शासकीय रुग्णालयात उपचार सुरू आहेत. पोलिसांनी या प्रकरणी 10 ते 12 जणांविरुद्ध गुन्हा दाखल केला असून त्यापैकी 5 जणांना अटक करण्यात आली आहे. उर्वरित आरोपींचा शोध सुरू असून पुढील तपास सुरू आहे.
