Crime News: जळगाव : मध्यप्रदेशातून (Madhy pradesh) गावठी बनावटीची पिस्तुले ( illegal weapons) आणून त्यांची जळगाव परिसरात विक्री करणाऱ्या टोळीचा जिल्हापेठ पोलिसांनी पर्दाफाश केला आहे. या कारवाईत सात जणांना अटक (Arrest) करण्यात आली असून त्यांच्या ताब्यातून 8 गावठी पिस्तुले आणि 10 जिवंत काडतुसे जप्त करण्यात आली आहेत. याबाबतची माहिती जिल्हा पोलीस अधीक्षक डॉ. महेश्वर रेड्डी यांनी पत्रकार परिषदेत दिली.
या प्रकरणाची माहिती मिळाल्यानंतर जिल्हापेठ पोलीस ठाण्याचे प्रभारी अधिकारी अनिल वाघ यांनी तातडीने कारवाईचे आदेश दिले. पोलिसांना मिळालेल्या माहितीनुसार इंडिया गॅरेज परिसरात राहणारा यश रामदास नन्नवरे हा गावठी पिस्तूल घेऊन फिरत असल्याचे समोर आले. त्यानुसार पोलीस पथकाने त्याला ताब्यात घेतले आणि त्याच्याकडून एक गावठी कट्टा जप्त केला. पुढील चौकशीत त्याने हे शस्त्र केशव सुनील भालेराव याच्याकडून घेतल्याचे सांगितले.
पोलिसांनी केशव भालेराव याला ताब्यात घेऊन चौकशी केली असता त्याने हे शस्त्र समाधान बळीराम निकम याच्याकडून मिळाल्याची माहिती दिली. त्यापैकी एक पिस्तूल यश नन्नवरे याला तर दुसरे गौरव देविदास साळवे याला दिल्याचेही उघड झाले. त्यानंतर पोलिसांनी गौरव साळवे यालाही अटक करून त्याच्याकडून एक पिस्तूल, 3 जिवंत काडतुसे आणि एक दुचाकी जप्त केली.
तांत्रिक तपासाच्या मदतीने समाधान निकम याला नेरी येथे ताब्यात घेण्यात आले. चौकशीत त्याने मध्यप्रदेशातून गावठी पिस्तुले आणून त्यांची विक्री करत असल्याची कबुली दिली. या कारवाईत केशव भालेराव, विकास काकडे, यश नन्नवरे, गौरव साळवे, जगदीश महाजन आणि कैलास माळी यांच्याकडून एकूण 8 पिस्तुले आणि 10 जिवंत काडतुसे जप्त करण्यात आली आहेत. या प्रकरणाचा पुढील तपास सुरू आहे.
