Alibaug Accident: रायगड : रायगड जिल्ह्यातील अलिबागमध्ये (Alibag) एक अत्यंत हृदयद्रावक घटना घडली असून एका कुटुंबाचा आनंद काही तासांतच दुखात बदलला आहे. अलिबाग वनविभागात वनरक्षक म्हणून कार्यरत असलेले सुरज सारंगे यांचा रस्ता अपघातात (Accident) दुर्दैवी मृत्यू (Death) झाला आहे. शुक्रवारी 6 मार्च रोजी रात्री उशिरा ही घटना रेवस ते रेड्डी मार्गावर घडली. रस्त्यावर खोदलेल्या एका मोठ्या खड्ड्यात त्यांची दुचाकी कोसळल्याने हा अपघात झाला.
सुरज सारंगे हे मुरुड तालुक्यातील सर्वे गावचे रहिवासी होते. ते तिनविरा भागात आपली सेवा बजावत होते. मिळालेल्या माहितीनुसार, शुक्रवारी रात्री काम संपवून ते दुचाकीवरून घराकडे निघाले होते. या मार्गावर सध्या रस्त्याचे काम सुरू असून तिथे एक खोल खड्डा खोदलेला होता. रात्रीच्या वेळी अंधार असल्याने त्यांना हा खड्डा दिसला नाही आणि त्यांची दुचाकी थेट खड्ड्यात कोसळली. या भीषण अपघातात गंभीर इजा झाल्यामुळे त्यांचा जागीच मृत्यू झाला.
या घटनेतील सर्वात ह्रदयद्रावक बाब म्हणजे सुरज यांना काही दिवसांपूर्वीच जुळी मुले झाली होती. शुक्रवारी दुपारीच त्यांची दोन्ही बाळे आणि पत्नी रुग्णालयातून घरी आली होती. पूर्ण कुटुंबात आनंदाचे वातावरण होते आणि सर्वजण या नव्या पाहुण्यांच्या स्वागतात गुंतले होते. मात्र, त्या रात्री काळाने घाला घातल्याने कुटुंबाचा आधार हिरावला गेला आहे.
या अपघातानंतर स्थानिक नागरिकांनी प्रशासनाविरुद्ध प्रचंड संताप व्यक्त केला आहे. रस्ता खोदलेल्या ठिकाणी कोणतीही सुरक्षा व्यवस्था नव्हती, तिथे बॅरिकेट्स किंवा सूचना फलक लावले नव्हते, असा आरोप स्थानिकांनी केला आहे. या निष्काळजीपणामुळेच एका तरुण वनरक्षकाचा बळी गेल्याचे बोलले जात आहे. वनपाल संघटनेने या प्रकरणाची सखोल चौकशी करून दोषींवर कारवाई करण्याची मागणी केली आहे. या घटनेमुळे संपूर्ण रायगड जिल्ह्यात हळहळ व्यक्त होत आहे.
