वॉशिंग्टन: “इराणवर एका रात्रीत नियंत्रण मिळवणे आम्हाला शक्य आहे आणि ती रात्र कदाचित उद्याचीच असू शकते,” या अमेरिकेचे राष्ट्राध्यक्ष डोनाल्ड ट्रम्प यांच्या विधानाने जागतिक राजकारणात खळबळ माजली आहे. व्हाईट हाऊसमध्ये आयोजित ‘इस्टर एग रोल’ कार्यक्रमादरम्यान, ट्रम्प यांनी सोमवारी रात्री इराणला आतापर्यंतचा सर्वात गंभीर इशारा दिला असून यामुळे आखाती देशांमध्ये युद्धाचे ढग गडद झाले आहेत.
गेल्या 38 दिवसांपासून अमेरिका, इस्रायल आणि इराण यांच्यात सुरू असलेल्या संघर्षाने आता टोक गाठले आहे. इराणमध्ये अडकलेल्या दोन अमेरिकन वैमानिकांची ज्या नाट्यमय पद्धतीने सुटका करण्यात आली, त्या मोहिमेचा उल्लेख करत ट्रम्प यांनी अमेरिकेची आक्रमक भूमिका स्पष्ट केली. सुरु असलेल्या गोळीबारात 21 विमानांनी ही मोहीम फत्ते केली, मात्र अमेरिकेचे एक हेलिकॉप्टर यात पूर्णपणे उद्ध्वस्त झाल्याचे त्यांनी सांगितले. ही घटना अमेरिकेसाठी युद्धाचे निमित्त ठरताना दिसत आहे.
जागतिक तेल व्यापारासाठी अत्यंत महत्त्वाची असलेली होर्मुझ सामुद्रधुनी पुन्हा उघडण्यासाठी इराणला दिलेली मुदत संपण्यापूर्वीच हा इशारा आला आहे. ट्रम्प यांनी स्पष्ट शब्दांत बजावले आहे की, जर इराणने ही सामुद्रधुनी उघडली नाही, तर त्यांच्या देशातील पूल, वीज प्रकल्प आणि नागरी पायाभूत सुविधांचे नामोनिशान शिल्लक राहणार नाही.
दरम्यान, व्हाईट हाऊसने 45 दिवसांच्या युद्धविरामाचा प्रस्ताव समोर ठेवला आहे. ट्रम्प यांच्या मते हे एक मोठे पाऊल असले तरी संघर्ष संपवण्यासाठी ते पुरेसे नाही. दुसरीकडे, इराणने हा प्रस्ताव फेटाळून लावत त्याला ‘केवळ अमेरिकेचा अजेंडा’ असे संबोधले आहे. दरम्यान, पुणे काय होणार? याकडे सर्वांचे लक्ष लागले आहे.
