अहिल्यानगर: कायद्याच्या डोळ्यात धूळ फेकून आणि एका महिलेच्या (Crime News) आयुष्याशी खेळून तिसऱ्या लग्नाचे स्वप्न पाहणाऱ्या एका व्यक्तीला अहिल्यानगर न्यायालयाने चांगलाच धडा शिकवला आहे. दोन लग्ने झालेली असतानाही, दुसऱ्या पत्नीशी घटस्फोट झाल्याची खोटी कागदपत्रे दाखवून तिसऱ्यांदा बोहल्यावर चढणाऱ्या जयदीप कौशिक मोरे (34) याला न्यायालयाने दोन वर्षांच्या सक्तमजुरीची शिक्षा सुनावली आहे. मुख्य न्यायदंडाधिकारी एल. एस. पाढेण यांनी दिलेला हा निकाल फसवणूक करणाऱ्यांसाठी मोठा इशारा मानला जात आहे.
“माझा दुसऱ्या पत्नीशी घटस्फोट झाला आहे,” असे सांगून त्याने चक्क बनावट न्यायालयीन कागदपत्रे तयार केली. या कागदपत्रांच्या आधारे फिर्यादी महिलेचा विश्वास संपादन करून त्याने विवाह उरकला. मात्र, लग्नानंतर अवघ्या काही दिवसांतच त्याचा हा खोटारडेपणा उघडा पडला आणि पीडितेने तोफखाना पोलीस ठाण्यात धाव घेतली.
न्यायालयात हे प्रकरण चालले तेव्हा सरकारी पक्षाने 4 महत्त्वाचे साक्षीदार उभे केले. या साक्षीतून हे सिद्ध झाले की, जयदीपने केवळ फसवणूकच केली नाही, तर न्यायालयाचा बनावट शिक्का आणि स्वाक्षरी वापरून बनावट कागदपत्रे बनवले आहे आरोपीला 2 वर्षे सक्तमजुरी आणि 10 हजार रुपये दंडाची शिक्षा सुनावली गेली. विशेष म्हणजे, दंडाची ही रक्कम पीडित महिलेला नुकसान भरपाई म्हणून देण्याचे आदेश देण्यात आले आहेत.
