Accident News: जळगाव : जळगाव जिल्ह्यातील जामनेर तालुक्यात एका भीषण अपघाताची (Accident) घटना समोर आली आहे. वाकोद गावाजवळ भरधाव वेगाने येणाऱ्या खाजगी बसने रस्त्यावर उभ्या असलेल्या बैलगाडीला जोरदार धडक दिली. या अपघातात बैलगाडीचे मोठे नुकसान झाले असून ती पूर्णपणे उद्ध्वस्त झाली आहे. सुदैवाने बैलगाडीचा मालक या अपघातातून बचावला, मात्र त्याला किरकोळ दुखापत झाली आहे.
मिळालेल्या माहितीनुसार, बैलगाडी चालक रस्त्याच्या कडेला उभा राहून मागून येणाऱ्या वाहनांना वाट देत होता. त्याच वेळी जळगाव ते छत्रपती संभाजीनगर मार्गावरून पुण्याकडे जाणारी एक खाजगी बस वेगात येत होती. चालकाचे नियंत्रण सुटल्याने बस थेट बैलगाडीवर आदळली. धडकेनंतर बैलगाडीवरील व्यक्ती रस्त्यावर फेकली गेली, पण काही वेळातच तो पुन्हा उभा राहिल्याचे दिसून आले.
या अपघाताची संपूर्ण घटना जवळील सीसीटीव्ही कॅमेऱ्यात कैद झाली आहे. या व्हिडिओमध्ये अपघाताचा थरार स्पष्ट दिसत असून तो सोशल मीडियावर मोठ्या प्रमाणात व्हायरल होत आहे. या घटनेमुळे परिसरात भीतीचे वातावरण निर्माण झाले आहे.
सुदैवाने या अपघातात कोणतीही जिवितहानी झाली नसली तरी घटनेची तीव्रता मोठी होती. या मार्गावर यापूर्वीही अपघाताच्या घटना घडल्या असल्याची माहिती स्थानिकांनी दिली आहे. त्यामुळे या अपघातानंतर ग्रामस्थ संतप्त झाले आणि त्यांनी वाकोद गावाजवळ गतिरोधक बसवण्याच्या मागणीसाठी रास्ता रोको आंदोलन केले.
दरम्यान, या घटनेनंतर प्रशासनाने या मार्गावरील सुरक्षेच्या उपाययोजनांकडे लक्ष देण्याची गरज व्यक्त होत आहे. भविष्यात अशा घटना टाळण्यासाठी योग्य उपाययोजना केल्या जातील का, याकडे सर्वांचे लक्ष लागले आहे.
