पुणे : नाशिकमधील भोंदू बाबाच्या कथित (Rupali Thombre Patil) अत्याचार प्रकरणामुळे पुण्यातील राष्ट्रवादी काँग्रेसमध्ये अंतर्गत संघर्ष पुन्हा उफाळून आला आहे. या प्रकरणाच्या केंद्रस्थानी आता राज्य महिला आयोगाच्या अध्यक्षा रूपाली चाकणकर (Rupali Chakankar) यांचे नाव आले असून, पक्षातील नेत्या रूपाली ठोंबरे पाटील यांनी त्यांच्यावर थेट हल्ला चढवला आहे. (Ashok Kharat)
नाशिक क्राईम ब्रांचने अटक केलेला अशोक खरात हा स्वतःला अंकशास्त्रज्ञ आणि आध्यात्मिक मार्गदर्शक म्हणून मांडत होता. मात्र त्याच्यावर एका महिलेवर अत्याचार केल्याचा गंभीर आरोप आहे. तपासादरम्यान त्याच्या मोबाईलमध्ये 50 हून अधिक महिलांचे आक्षेपार्ह व्हिडिओ सापडल्याची माहिती समोर आली आहे. यामुळे हा प्रकार केवळ एक गुन्हा न राहता व्यापक शोषणाच्या जाळ्याशी संबंधित असल्याची चर्चा सुरू झाली आहे.
या प्रकरणात सर्वाधिक वाद निर्माण झाला तो अशोक खरात आणि रूपाली चाकणकर यांच्यातील कथित संबंधांमुळे. खरात हा त्यांचा ‘गुरू’ आणि निकटवर्तीय असल्याचे आरोप पुढे येताच राजकीय वातावरण तापले. यावरून रूपाली ठोंबरे पाटील यांनी सोशल मीडियावरून तीव्र प्रतिक्रिया देत, संवैधानिक पदावर असलेल्या व्यक्तींच्या भूमिकेवरच प्रश्नचिन्ह उपस्थित केले.
“अशा प्रकरणात संबंधित व्यक्तींवर कारवाई कशी होणार, आणि पीडितांना न्याय कसा मिळणार?” असा थेट सवाल त्यांनी उपस्थित केला. तसेच हा विषय इथवरच थांबणार नाही, असा इशाराही त्यांनी दिला आहे.
या घडामोडींमुळे दोन महत्त्वाचे मुद्दे समोर आले आहेत. एक म्हणजे अंधश्रद्धा आणि तथाकथित बाबांच्या माध्यमातून सुरू असलेले शोषण, आणि दुसरे म्हणजे अशा व्यक्तींशी जोडले जाणारे राजकीय संबंध. त्यामुळे या प्रकरणाचा तपास केवळ गुन्हेगारी दृष्टिकोनातूनच नव्हे, तर सामाजिक आणि राजकीय पार्श्वभूमीवरही होण्याची गरज व्यक्त केली जात आहे.
