बारामती: बारामती विधानसभेच्या पोटनिवडणुकीने (Baramati Politics) आता अनपेक्षित राजकीय वळण घेतले आहे. उपमुख्यमंत्री सुनेत्रा पवार (Sunetra Pawar) यांना राष्ट्रवादीकडून उमेदवारी देण्याची तयारी असताना, या निवडणुकीत विरोधात उमेदवार न देण्याची भूमिका सुप्रिया सुळे (Supriya Sule) यांनी मांडली होती. मात्र या भूमिकेला महाविकास आघाडीतील काँग्रेसकडून (Vijay Vadettiwar) उघड विरोध झाला आहे. (Baramati By Election)
काँग्रेस नेते विजय वडेट्टीवार यांनी स्पष्टपणे सांगितले की, “राष्ट्रवादीने उमेदवार दिला नाही, तर काँग्रेस बारामतीत उमेदवार देण्याचा विचार करेल.” त्यांच्या या विधानामुळे आघाडीत मतभेद उघड झाले असून बारामतीची निवडणूक आता बिनविरोध राहणार नसल्याचे संकेत मिळत आहेत.
बारामती ही पारंपरिकदृष्ट्या पवार कुटुंबाचा बालेकिल्ला मानली जाते. त्यामुळे अजित पवार यांच्या निधनानंतर येथे निवडणूक बिनविरोध होण्याची शक्यता व्यक्त केली जात होती. मात्र काँग्रेसच्या भूमिकेमुळे हे समीकरण बदलताना दिसत आहे. आघाडीतील घटक पक्षांमध्ये समन्वयाचा अभाव असल्याचेही या घडामोडीतून स्पष्ट झाले आहे.
या राजकीय घडामोडींना आणखी एक ट्विस्ट म्हणजे ओबीसी नेते लक्ष्मण हाके यांनीही या निवडणुकीत उतरण्याची तयारी दर्शवली आहे. त्यांनी बारामतीत निवडणूक लढवण्याचा निर्धार व्यक्त केला आहे. त्यामुळे एकेकाळी बिनविरोध होण्याची चर्चा असलेली ही निवडणूक आता तिरंगी लढतीकडे झुकताना दिसत आहे.
23 एप्रिल रोजी मतदान आणि 4 मे रोजी निकाल जाहीर होणार आहे. या निवडणुकीत केवळ उमेदवारांची लढत नसून, महाविकास आघाडीतील अंतर्गत समीकरणे, पवार कुटुंबाचे राजकीय वर्चस्व आणि नव्या राजकीय पर्यायांची ताकद यांचीही कसोटी लागणार आहे.
