फुलंब्री (छत्रपती संभाजीनगर): येथे उपचारासाठी आलेल्या एका चाळीस वर्षीय महिलेला अनोळखी दुचाकीस्वाराने वडोद कान्होबा येथे नेऊन अंगावरील दागिने काढुन जब्बर मारहाण केली. ही घटना मंगळवारी (दि.१६) भरदुपारी घडली. दरम्यान या जखमी महिलेला फुलंब्री ग्रामीण रुग्णालयात उपचार करून नंतर घाटीत दाखल करण्यात आले. संगीता किसन जाधव (रा. कनकोरा ता. जि. छत्रपती संभाजीनगर) असे पिडीत महिलेचे नाव आहे.
संगीता जाधव या मंगळवारी फुलंब्री येथील शिंदे हॉस्पिटल येथे उपचारासाठी आल्या होत्या. उपचार करून झाल्यानंतर त्यांना त्या ठिकाणी एक अनोळखी व्यक्ती भेटला. त्याने संगीता जाधव यांना दुचाकीवर बसून खुलताबाद रस्त्यावर वडोद कान्होबा परिसरात नेऊन जब्बर मारहाण करत त्यांच्या अंगावरील सोन्याचे दागिने काढुन घेतले. यानंतर तो दुचाकीवर पसार झाला. मारहाणीत संगीता यांच्या डोक्याला, हातापायाला जबर दुखापत झाली. यावेळी त्यांच्या ओरडण्याचा आवाज ऐकून परिसरातील शेतकऱ्यांनी धाव घेत त्यांची विचारपूस केली. त्यांनी सर्व प्रकार कथन करत एका नातेवाईकाचा मोबाईल नंबर दिला. यानंतर संगीता यांना रोहन निकम यांनी प्रथम फुलंब्री ग्रामीण रुग्णालयात उपचारासाठी दाखल केले. प्रथमोपचारानंतर त्यांना घाटीत दाखल करण्यात आले. मारहाण करणाऱ्या, दागीने लुटणाऱ्या व्यक्तीला त्या ओळखत नसल्याचे त्यांच्या नातेवाईकांनी सांगितले. भरदिवसा घडलेल्या या घटनेमुळे फुलंब्रीसह परिसरात दहशत निर्माण झाली आहे.
