छत्रपती संभाजीनगर: इराण-अमेरिका तणाव काहीसा कमी (Chhatrapati Sambhajinagar) झाल्याचे चित्र असले तरी देशातील गॅस पुरवठ्याची समस्या अद्याप कायम असल्याचे दिसत आहे. अनेक ठिकाणी घरगुती गॅस सिलेंडरसाठी नागरिकांना एजन्सीबाहेर रांगा लावाव्या लागत असून, हॉटेल व्यवसायावरही त्याचा परिणाम होत आहे. शासनाकडून गॅसचा पुरवठा सुरळीत असल्याचा दावा केला जात असला तरी प्रत्यक्षात नागरिकांना मोठ्या अडचणींचा सामना करावा लागत आहे. (Latest Marathi News)
याच पार्श्वभूमीवर छत्रपती संभाजीनगर शहराजवळ एक धक्कादायक घटना घडली आहे. वाळूज परिसरातील रांजणगाव शेपू येथील कमल गॅस एजन्सीमध्ये गॅस सिलेंडर मिळत नसल्याने एका व्यक्तीने संतापाच्या भरात स्वतःचे डोके फोडून घेतले. ही घटना दुपारी सुमारे 1 वाजण्याच्या सुमारास घडली.
जखमी व्यक्तीचे नाव बालचंद नेमाने (वय 50, रा. रांजणगाव) असे आहे. ते अनेक दिवसांपासून गॅस सिलेंडरसाठी एजन्सीच्या फेऱ्या मारत होते. मात्र वारंवार प्रयत्न करूनही गॅस मिळत नसल्याने ते संतप्त झाले. “घरी बायकोला काय सांगू?” असे म्हणत त्यांनी संतापाच्या भरात स्वतःलाच इजा करून घेतल्याचे समोर आले आहे.
या घटनेनंतर गॅस एजन्सीबाहेर काही काळ गोंधळाचे वातावरण निर्माण झाले होते. माहिती मिळताच पोलिसांनी घटनास्थळी धाव घेत जखमी व्यक्तीला उपचारासाठी घाटी रुग्णालयात दाखल केले.
या प्रकारामुळे गॅस टंचाईचा प्रश्न पुन्हा एकदा ऐरणीवर आला आहे. नागरिकांना अत्यावश्यक असलेल्या गॅससाठी अशी परिस्थिती निर्माण होणे गंभीर बाब मानली जात असून, प्रशासनाने तातडीने उपाययोजना करण्याची मागणी होत आहे.
