Suicide News: अमरावती : शहर पोलीस आयुक्तालयात कार्यरत असलेल्या शीघ्र कृती दलातील एका जवानाने आत्महत्या केल्याची धक्कादायक घटना गुरुवारी सकाळी उघडकीस आली. विजय दिलीप नागापुरे (वय 35) असे मृत जवानाचे नाव असून या घटनेमुळे पोलीस विभागात हळहळ व्यक्त केली जात आहे.
मिळालेल्या माहितीनुसार, विजय नागापुरे हे मंगळवारी रात्री ड्युटीवर होते. ड्युटी संपल्यानंतर बुधवारी सकाळी सुमारे 9 वाजण्याच्या सुमारास त्यांनी पोलीस आयुक्तालयातील QRT कार्यालयात स्वतःच्या शासकीय पिस्तुलातून डोक्यात गोळी झाडून आत्महत्या केली. ही घटना समजताच वरिष्ठ अधिकारी तातडीने घटनास्थळी दाखल झाले.
ही बाब सर्वप्रथम QRT मधील एका कर्मचाऱ्याच्या लक्षात आली. त्याने तत्काळ वरिष्ठांना माहिती दिल्यानंतर पोलीस यंत्रणा सतर्क झाली. घटनास्थळी फॉरेन्सिक पथक आणि डॉग स्कॉडला बोलावण्यात आले. तपासादरम्यान पिस्तुलातील गोळी जप्त करण्यात आली असून पुढील चौकशी सुरू आहे.
मृतदेह शवविच्छेदनासाठी जिल्हा सामान्य रुग्णालयात पाठवण्यात आला आहे. विजय नागापुरे हे मोर्शी तालुक्यातील धामणगाव काटपूर येथील रहिवासी होते आणि सध्या अमरावतीत कुटुंबासोबत राहत होते. ते 2014 मध्ये पोलीस सेवेत दाखल झाले होते.
या घटनेमागील कारण अद्याप स्पष्ट झालेले नाही. पोलीस विभागाकडून सखोल तपास सुरू असून या घटनेमुळे पोलीस दलात शोककळा पसरली आहे.
